د کابل په لوېدیځ کې د «امېد سبز» ښارګوټي د سلګونو کورونو د تخلیې د امر له راپورونو وروسته، د طالبانو د عدلیې وزارت ویلي چې د دې ښارګوټي ځمکه «د امارتي ځانګړې محکمې د شرعي پرېکړې له مخې ثابته شوې او د ځمکو د غصب د مخنیوي کمېسیون مکلف دی چې دغه پرېکړه عملي کړي.»
دغه وزارت نن (دوشنبه، ١٢ د زمری) په یوه اعلامیه کې ویلي، هغه کسان چې اوس مهال په دې ښارګوټي کې کورونه او ځمکې لري، «کولای شي د ځمکې د بیې او تاوان د ترلاسه کولو لپاره پلورونکي ته مراجعه وکړي.»
د طالبانو د «مرکزي زون د غصب شویو امارتي (دولتي) ځمکو د قضیو د څېړلو ځانګړې محکمې» د روان لمریز کال د حمل په ۳۱مه، د کابل په شپږمه او دیارلسمه ناحیه کې د امېد سبز ښارګوټي ۱۵۰۷.۴۹ جریبه ځمکه «امارتي» اعلان کړه.
د طالبانو د عدلیې وزارت وايي، د دې پرېکړې له مخې، دغه ځمکه په پنځو کادستري ټوټو کې د دولت په نوم ثبت او سروې شوې او حقیقي یا حکمي اشخاصو ته نه ده انتقال شوې.
دغه وزارت زیاته کړې: «د ځانګړې محکمې په شرعي پرېکړه کې راغلي چې یاده ځمکه دې د ځمکو د غصب د مخنیوي او د غصب شویو ځمکو د بېرته سپارلو کمېسیون ته وسپارل شي او پېرودونکي (اوسني متصرفین) کولای شي د ځمکې د بیې او تاوان د اخیستلو لپاره پلورونکي ته مراجعه وکړي.»
د طالبانو د عدلیې وزارت ټینګار کړی: «له همدې امله، د ځمکو د غصب د مخنیوي او د غصب شویو ځمکو د بېرته سپارلو کمېسیون مکلف دی چې د امارتي غصب شویو ځمکو د قضیو د څېړلو د ځانګړې محکمې شرعي پرېکړې عملي کړي.»
«امید سبز ښارګوټی» د کابل په لوېدیځ کې موقعیت لري او اوسېدونکي یې ډېری هزارهګان دي.
دا ښارګوټی په تېرو شلو کلونو کې جوړ شوی او ویل کېږي چې د افغانستان د پخواني ولسمشر د دویم مرستیال محمد کریم خلیلي ورور، محمد نبي خلیلي، یې د عمده ونډهوالو له ډلې څخه دی.
طالبانو په افغانستان کې له بیا واکمنېدو وروسته لسګونه ښارګوټي ارزولي او د هغوی ځمکې یې «امارتي» اعلان کړې دي؛ خو د ښارګوټو مالکین شکایت کوي چې د څېړنې په بهیر کې یې اسناد او مدارک په بېطرفانه ډول نه دي ارزول شوي.
