«د افغانستان متحدې جبهې» ویلي، ځواکونو یې په تېرو ۴۸ ساعتونو کې د هېواد په پنځو ولایتونو کې پر طالبانو بریدونه کړي، چې د دوی په وینا، په دغو نښتو کې د طالبانو ۱۹ غړي وژل شوي او ټپیان شوي دي.
متحدې جبهې د جمعې شپې (د زمري ۱۶مه) په یوه خبرپاڼه کې ویلي، دغه بریدونه په کندهار، هلمند، غور، بغلان او بدخشان ولایتونو کې ترسره شوي دي.
په خبرپاڼه کې راغلي چې ځواکونو یې د دغو عملیاتو پر مهال د طالبانو دوه قرارګاوې نیولې او د هغوی ګڼ شمېر وسلې او مهمات یې ترلاسه کړي دي.
متحده جبهه ادعا کوي چې د کندهار د میوند ولسوالۍ د «بند تیمور» په سیمه کې یې دوه جلا عملیات ترسره کړي، چې په یوه کې یې د طالبانو یو لوړپوړی پولیس افسر وژل شوی دی.
دغه جبهه همداراز وایي، د کندهار ښار د ۱۵مې امنیتي حوزې په مربوطاتو کې یې په یوه بل عملیات کې د طالبانو یو غړی وژلی دی.
متحدې جبهې ویلي چې په تېرو دوو شپو او ورځو کې یې د هلمند د نوزاد ولسوالۍ په «بر نوزاد» سیمه کې هم عملیات کړي، چې په پایله کې یې د طالبانو یو قوماندان وژل شوی دی.
جبهې زیاته کړې چې ځواکونو یې د غور ولایت د الفاروق ولسوالۍ په «ګرداب» سیمه کې د طالبانو یوه قرارګاه نیولې، چې په پایله کې یې د طالبانو دوه غړي وژل شوي او څلور نور ټپیان شوي دي.
په خبرپاڼه کې همداراز ویل شوي چې د بغلان ولایت د پل حصار ولسوالۍ کې یې هم د طالبانو یوه پوځي قرارګاه نیولې، چې په پایله کې یې د طالبانو دوه غړي وژل شوي او درې نور ټپیان شوي دي.
«د افغانستان متحدې جبهې» په بدخشان کې د خپل لومړي برید خبر هم ورکړی او ویلي یې دي چې ځواکونو یې د ارګو ولسوالۍ کې د طالبانو یو غړی وژلی او څلور نور یې ټپیان کړي دي.
خو طالبانو تر اوسه د متحدې جبهې د دغو ادعاوو په اړه څه نه دي ویلي.
تر دې وړاندې د طالبانو ویاند ذبیحالله مجاهد ویلي وو چې دغه جبهه په هېواد کې حضوري فعالیت نه لري.
