د سرپل ولایت سرچینې وايي، د پخواني حکومت د پولیسو د یوه غړي جسد له یوې څاه څخه موندل شوی دی. د سرچینو په وینا، دغه پخوانی نظامي په مرموز ډول په ډزو وژل شوی دی.
یوې سرچینې نن (یکشنبه، د لړم ۱۷مه) اطلاعات روز ورځپاڼې ته په یوه پیغام کې ویلي، چې د دغه پخواني نظامي نوم عبدالبشیر محمدي و او اصلي اوسېدونکی د سرپل د سوزمهکلا ولسوالۍ و.
د سرچینې په خبره، ۲۸ کلن عبدالبشیر د پخواني حکومت پر مهال د سرپل د امنیه قوماندانۍ په چوکاټ کې دنده ترسره کوله او د جمهوري نظام له سقوط وروسته یې د دغه ولایت په مرکز کې د موټرچلوونکي په توګه کار کاوه.
سرچینې زیاته کړې، چې عبدالبشیر له تېرو ۲۵ ورځو راهیسې ورک و او کورنۍ یې ګومان کاوه چې ایران یا ترکیې ته تللی دی. خو د شنبې په ناوخته (د لړم ۱۶مه) یې جسد د سرپل ښار په توغني سیمه کې له یوې څاه څخه موندل شوی دی.
د سرچینې په وینا، د سیمې اوسېدونکو جسد له څاه څخه ایستلی او د هغه د تذکرې او جامو له کتنې وروسته یې پېژندلی چې جسد د عبدالبشیر محمدي دی.
سرچینې ویلي، د طالبانو پولیسو ورته ویلي چې عبدالبشیر محمدي د تفنګچې په ډزو وژل شوی دی؛ خو د هغه د وژنې انګېزه او عاملان لا هم نه دي معلوم.
په تېرو پنځو کلونو کې، سره له دې چې طالبانو عمومي عفوه اعلان کړې، د پخوانیو نظامیانو د وژنو پېښې دوام لري. په ځینو مواردو کې، د اللهداد په څېر یو شمېر پخواني نظامیان د طالبانو له لوري نیول شوي او وروسته یې جسدونه کورنیو ته سپارل شوي دي.
په نورو پېښو کې بیا پخواني نظامیان د ناپېژاندو کسانو له لوري په مرموز ډول وژل شوي دي. له دې سره، طالبان ادعا کوي چې د خپل مشر د عمومي عفوې فرمان ته ژمن دي.
