ازبکستاني رسنیو راپور ورکړی چې یو افغان وګړی د «ترمز نړیوال بازار» کې د نشهيي توکو د پلور په تور نیول شوی دی.
د «دریا» خبري اژانس نن (شنبه، د زمري ۳۱مه) راپور ورکړی چې تورن کس ۲۳ کلن نارینه دی.
د راپور له مخې، دغه افغان وګړي ۵۰۶ ګرامه تریاک «په خپل بدن کې د پټولو له لارې» له پولې پورې اړولي وو او غوښتل یې چې په ګډ بازار کې یې وپلوري.
د ازبکستان د کورني امنیت ادارې ویلي چې دغه افغان وګړی هغه مهال ونیول شو چې د ۲۵۰۰ امریکايي ډالرو په بدل کې یې د یادو نشهيي توکو د پلورلو معامله کوله.
په همدې وخت کې، ازبکستاني امنیتي ځواکونو په همدې سرحدي سیمه کې درې نور کسان هم د نشهيي توکو د قاچاق په تور نیولي دي. په یوه قضیه کې ۴۶ کلن نارینه د یوه کیلوګرام تریاکو او نږدې یوه کیلوګرام چرسو د قاچاق په تور، او په بله قضیه کې ۴۰ او ۶۰ کلن دوه نارینه د نیم کیلوګرام چرسو د قاچاق په تور نیول شوي دي.
اوس مهال د ټولو څلورو تورنو کسانو پر وړاندې، چې په دریو جلا قضیو کې نیول شوي، جنایي دوسیې جوړې شوې دي.
که څه هم طالبان وایي چې د نشهيي توکو له کښت او سوداګرۍ سره مبارزه کوي، خو د منځنۍ اسیا هېوادونه د افغانستان له خاورې څخه د نشهيي توکو د قاچاق د زیاتېدو راپورونه ورکوي.
د تاجکستان د ملي امنیت کمېټې پرون اعلان وکړ چې دوه افغان وګړي هغه مهال د تاجکستان له سرحدي ځواکونو سره په وسلهواله نښته کې ووژل شول، چې غوښتل یې ۱۷ کیلوګرامه چرس قاچاق کړي.
