د هېواد په ګرمو سیمو کې نوی ښوونیز کال په داسې حال کې پیلېږي چې د کندهار نږدې ټول دولتي ښوونځي د ښوونکو له کمښت سره مخ دي.
د کندهار د احمدشاهۍ لېسې یوې سرچینې ویلي چې په دغه ښوونځي کې له لومړي ټولګي څخه تر دولسم ټولګي پورې د ښوونکو کمښت موجود دی.
سرچینه زیاتوي چې د ښوونکو د کمښت ستونزه د کندهار ښار او د دغه ولایت په ټولو ولسوالیو کې هم موجوده ده.
په ورته وخت کې، د کندهار د پوهنې ریاست یوې سیمهییزې سرچینې ویلي چې د مالي ستونزو له امله سږ کال په دغه ولایت کې د موقتي قراردادي ښوونکو ګمارنه هم درول شوې ده.
سرچینې ویلي، د طالبانو د پوهنې ریاست ټولو ښوونځیو ته خبر ورکړی چې تر بلې خبرتیا پورې دې هېڅ قراردادي ښوونکی ونه ګماري.
بلخوا، د کندهار د پوهنې ریاست مسوولان وايي چې د نوي ښوونیز کال لپاره د ۵۰ زره زدهکوونکو د جذب ظرفیت لري او دغه زدهکوونکي به په ښوونځیو کې جذب کړي.
له کندهار پرته، د افغانستان په کچه د ښوونځیو د ښوونکو د کمښت ستونزه هم پراخه ده.
طالبانو په داسې حال کې چې د نجونو پر زدهکړو یې محدودیتونه لګولي، د دیني مدرسو د پراختیا لړۍ هم چټکه کړې ده.
د شمېرو له مخې، په افغانستان کې د طالبانو له بیا واکمنېدو وروسته د دیني مدرسو شمېر د ۲۰۲۵ کال تر سپټمبر پورې له پنځو زرو څخه ۲۳ زرو ته لوړ شوی دی.
د ملګرو ملتونو د بشري حقونو ځانګړي راپور ورکوونکي، ریچارډ بېنېټ، په خپل تازه راپور کې ویلي چې د طالبانو لهخوا د دیني مدرسو پراختیا ښايي د افغانستان ټولنیز جوړښت بدل کړي.
هغه ویلي چې د هغو کورنیو اندېښنې یې هم اورېدلې دي چې د خپلو اولادونو د چلند د بدلون په اړه اندېښمنې دي.
