د اتریش د هوايي شرکت یوه مسافر وړونکې الوتکه چې له تلابیب څخه ویانا ته روانه وه، د «بم ایښودلو د ګواښ» له ترلاسه کولو وروسته یې خپله لاره بدله کړې او د بلغاریا په پلازمېنه صوفیه کې یې بېړنۍ ناسته کړې ده.
د بلغاریا د ترانسپورټ او اړیکو وزارت ویلي چې دغه الوتکه د یکشنبې په شپه (د تلې ۲۶مه) شاوخوا نهه بجې، د بېړني حالت د ۷۷۰۰ کوډ له لېږلو وروسته، د رومانیا له پولې بېرته ګرځېدلې او د صوفیه په هوايي ډګر کې کېناستې ده.
د «ټایمز اف اسراییل» ورځپاڼې د راپور له مخې، د «ایربس اې ۳۲۰» ډوله دغه الوتکه، چې ۵۱ مسافر او شپږ د عملې غړي یې لېږدول، د «اواېس ۸۲» الوتنې په شمېره د تلابیب له بنګوریون نړیوال هوايي ډګر څخه پورته شوې وه او د ویانا پر لور روانه وه.
د دې رسنۍ د راپور له مخې، د الوتکې عمله د رومانیا پولې ته د نږدې کېدو پر مهال خبره شوه چې د الوتکې د الوځولو ګواښ شوی دی. له همدې امله یې پرېکړه وکړه چې د امنیتي تدابیرو د پلي کولو لپاره د صوفیه په هوايي ډګر کې ناسته وکړي.
د ګواښ د راپور له ترلاسه کولو وروسته، د بلغاریا چارواکو اړین امنیتي او عملیاتي اقدامات پیل کړل. د دغه هېواد د هوايي ځواک یوه «میګ ۲۹» جنګي الوتکه د مسافر وړونکې الوتکې د بدرګې لپاره پورته شوه او تر صوفیه هوايي ډګره یې ورسره ملتیا وکړه.
الوتکې په پای کې په خوندي ډول د صوفیه په هوايي ډګر کې ناسته وکړه او وروسته ټول مسافر او د عملې غړي ترې ښکته کړل شول.
د بلغاریا د ترانسپورټ او اړیکو وزارت ویلي چې د دغه هېواد چارواکو سمدستي د کړکېچ د مدیریت مرکز جوړ کړ او د ګواښ د ماهیت د معلومولو لپاره یې امنیتي څېړنې پیل کړې.
د ګواښ د سرچینې په اړه «ټایمز اف اسراییل» لیکلي: «ګواښ یوه اتریشي وګړي کړی و چې خپله په الوتکه کې نه و.»
خو د بلغاریا چارواکو په لومړنۍ اعلامیه کې د ګواښ کوونکي هویت او د پیغام د لېږلو څرنګوالی نه دی روښانه کړی او په دې اړه لا هم جزئیات معلوم نه دي.
که څه هم د شپې په اوږدو کې د الوتکې امنیتي پلټنې ترسره شوې، خو د الوتکې له ناستې نږدې ۱۲ ساعته وروسته هم د دې الوتنې په تړاو د چاودېدونکو توکو د موندلو یا شتون په اړه کره معلومات نه دي خپاره شوي.
د الوتکې د مسافرو هویت هم نه دی اعلان شوی. «ټایمز اف اسراییل» لیکلي چې د ځوانانو یوه ډله، چې له تلابیب څخه په ویانا کې د ملګرو ملتونو په یوه غونډه کې د ګډون لپاره روانه وه، په الوتکه کې سپره وه.
دا پېښه په داسې حال کې شوې چې په وروستیو میاشتو کې له اسراییلو سره تړلو الوتنو د امنیتي اندېښنو له امله له ستونزو سره مخ شوې دي. په دې پېښو کې د «فلای دوبۍ» د هغې الوتنې پېښه هم شامله ده چې تلابیب ته روانه وه. په دې پېښه کې مرستیال پیلوټ پر اصلي پیلوټ برید کړی و او په پای کې یوه احتیاطي پیلوټ او د هغه مرستیال، چې د مسافرو په توګه په الوتکه کې سپاره وو، د الوتکې کنټرول په لاس کې اخیستی او په سعودي عربستان کې یې ناسته کړې وه.
خو د تېرې شپې د پېښې په تړاو تر اوسه داسې شواهد نه دي خپاره شوي چې دغه ګواښ له نورو امنیتي پېښو سره وتړي یا یې احتمالي انګېزه «سیاسي یا ترهګریزه» وښيي.
د اتریش هوايي شرکت د پېښې او په صوفیه کې د الوتکې د ناستې پخلی کړی او ویلي یې دي چې د ګواښ د سرچینې او د الوتکې د امنیتي پلټنو د وروستۍ پایلې معلومولو لپاره د مسوولو چارواکو څېړنې روانې دي.
