د مصر پارلمان له حوثیانو سره په جګړه کې د سعودي عربستان د ملاتړ لپاره د اجازې ورکولو په اړه رایه اچونه یوه بله اوونۍ ځنډولې ده.
د مصر دولتي ورځپاڼې «الاخبار» راپور ورکړی چې ټاکل شوې د دې موضوع په اړه بحثونه د روانې میلادي میاشتې په ۲۶مه بېرته پیل شي.
د مصر پارلمان پرون هم په دې اړه پرېکړه یوه ورځ ځنډولې وه، څو ټولو استازو ته فرصت ورکړل شي چې خپل نظرونه څرګند او وړاندیزونه مطرح کړي.
د مصر ولسمشر عبدالفتاح السیسي د شنبې په ورځ د دغه هېواد له پارلمان څخه وغوښتل چې له سعودي عربستان سره د پوځي ملاتړ د اجازې ورکولو په اړه د رایې اچونې لپاره بېړنۍ غونډه جوړه کړي.
د مصر پارلمان تر اوسه په دې اړه دوه غونډې کړې دي، خو د فرانسې خبري اژانس د راپور له مخې، دواړه غونډې له کومې پایلې پرته پای ته رسېدلې دي.
د مصر پارلمان دوو غړو د یکشنبې په ورځ دغه خبري اژانس ته ویلي وو چې لا هم په دې اړه پرېکړه نه ده شوې، خو د پارلمان ډېری استازي د دې وړاندیز ملاتړ کوي.
د مصر ولسمشر ویلي وو چې د قاهرې لپاره دا «د تصور وړ نه ده» چې د سعودي عربستان امنیت او ثبات له ګواښ سره مخ وي او مصر لاس تر زنې کښېني او هېڅ اقدام ونه کړي.
هغه ټینګار کړی و چې مصر «له هېچا سره د مقابلې او پر هېڅ لوري د برید نیت نه لري» او زیاته کړې یې وه چې «زموږ خبره د دفاع په اړه ده».
د حوثیانو او د سعودي عربستان په مشرۍ د ایتلاف ترمنځ، چې د نړیوالې ټولنې له خوا په رسمیت پېژندل شوي د یمن د حکومت ملاتړ کوي، له یوې لسیزې راهیسې روانه جګړه د جولای په میاشت کې یو ځل بیا شدیده شوې ده.
حوثیانو د سپټمبر په میاشت کې د سره سمندرګي پر غاړه د یمن د ساحلي سیمو یوه لویه برخه ونیوله او له هغه وخت راهیسې یې پر سعودي عربستان بریدونه کړي دي.
حوثیانو په دغو بریدونو کې د سعودي عربستان د دولتي تېلو شرکت «ارامکو» تاسیسات او د ریاض نړیوال هوايي ډګر هم په نښه کړي دي.
مصر په ۲۰۱۵ کال کې په یمن کې د سعودي عربستان په مشرۍ په پوځي مداخله کې برخه واخیسته او اوس هم د حوثیانو پر ضد د عربي ایتلاف رسمي غړی دی، خو په تازه جګړه کې یې لا پوځي مداخله نه ده کړې.
