د ننګرهار په مرکز جلالاباد ښار کې د نابیناوو او ناشنوایانو په ځانګړي ښوونځي کې د ټرانسپورټي اسانتیاوو نشتون او مالي ستونزو له امله له ۱۶۰ ډېر زدهکوونکي، چې نجونې هم پکې شاملې دي، له زدهکړو پاتې شوي دي.
د ښوونځي یوه مسوول اطلاعات روز ته ویلي، چې تر دې وړاندې په ښوونځي کې د ۶۰ نجونو په ګډون څه باندې ۲۰۰ زدهکوونکو زدهکړې کولې، خو په تېرو نږدې دوو کلونو کې د ټرانسپورټ د نشتون او د مرستندویه بنسټونو د مرستو د درېدو له امله د زدهکوونکو شمېر کم شوی دی.
د نوموړي په وینا، پخوا به زدهکوونکي له کورونو ښوونځي ته راوړل کېدل او بېرته خپلو کورونو ته رسول کېدل، خو اوس د دې اسانتیا د نشتون له امله ځینو کورنیو خپلو اولادونو ته ښوونځي ته د تګ اجازه نه ده ورکړې. هغه زیاته کړې، که ټرانسپورټ برابر شي، یو شمېر کورنۍ چمتو دي چې خپل هلکان او نجونې بېرته ښوونځي ته ولېږي.
د ښوونځي مسوول ویلي، چې د لیک لوست ترڅنګ زدهکوونکو ته حرفوي زدهکړې هم ورکول کېدې، خو د مالي ستونزو له امله دا پروګرام هم درېدلی دی. نوموړي زیاته کړې، ښوونځی له کلونو راهیسې په یوه کرایي کور کې فعالیت کوي او کله ناکله د کرایې د ورکولو توان هم نه لري. هغه له خیریه بنسټونو د مرستې غوښتنه کړې ده.
د زدهکوونکو کورنیو هم له مسوولانو غوښتي، چې د ټرانسپورټ او نورو اړینو اسانتیاوو په برابرولو سره د خپلو اولادونو د زدهکړو زمینه برابره کړي.
په همدې حال کې، د ننګرهار د پوهنې ریاست لپاره د طالبانو رییس مفتي محمد فرید حقاني د ښوونځي ستونزې منلې او ویلي یې دي، چې د حل لپاره یې هڅې روانې دي. د هغه په وینا، پخوا ځینو مرستندویه بنسټونو له ورته ښوونځیو سره مرسته کوله، خو اوس دغه مرستې درېدلې دي.
حقاني زیاته کړې، هڅه کوي چې د ټرانسپورټ او نورو ستونزو د حل لپاره لاره پیدا کړي او په ولسوالیو کې هم د ناشنوایانو لپاره لنډمهاله ښوونیز ټولګي جوړ کړي.
د ننګرهار د پوهنې ریاست د معلوماتو له مخې، په جلالاباد کې دغه ځانګړې لېسه د نابیناوو او ناشنوایانو لپاره یوازینی ځانګړی ښوونیز مرکز دی، چې له کلونو راهیسې پکې له لومړي تر دولسم ټولګي پورې د اشاروي ژبې او لیک لوست زدهکړې ورکول کېږي.
