د هالنډ چارواکو اعلان کړی چې ۳۶ کسان یې، چې ټول د افغانستان وګړي دي، له یوې سرګردانه ربړي کښتۍ څخه ژغورلي دي.
د هالنډ د شاهي پوځي پولیسو ویاند، دورون والین، فرانس پرېس خبري اژانس ته ویلي: «دا لومړی ځل دی چې موږ د هالنډ په اوبو کې له داسې پېښې سره مخ کېږو، خو لا هم نه پوهېږو چې کښتۍ له کوم ځای څخه حرکت کړی و.»
د ژغورنې عملیات د هالنډ په سوېلي ساحلونو کې، د برسکنس ښار ته نږدې په اوبو کې ترسره شوي دي. دغه ښار د شمالي سمندر په هغې غاړه کې پروت دی چې د بریتانیا پر وړاندې واقع دی.
په دې ربړي کښتۍ کې ۳۸ نارینه سپاره وو، چې ۳۶ تنو یې ځانونه افغانان او دوو نورو یې ځانونه د سوډان وګړي معرفي کړي دي.
والین ویلي، د سوډان دوه وګړي د انسانانو د قاچاق په شک نیول شوي دي.
تر اوسه معلومه نه ده چې د دې کښتۍ موخه کوم ځای ته رسېدل وو.
د نوموړي په وینا، د کښتۍ سپرو کسانو هېڅ ډول هویتي اسناد نه لرل او د ژغورنې واسکټونه یې هم نه وو اغوستي.
کښتۍ چې انجن یې نه درلود، په اوبو کې سرګردانه پاتې شوې وه او په «ډېر خطرناک» وضعیت کې وه، له همدې امله چارواکو د ژغورنې عملیات پیل کړل.
یاده کښتۍ د کادزاند کلي ته ولېږدول شوه او هغو کسانو ته چې اړتیا یې لرله، لومړنۍ مرستې برابرې شوې.
وروسته د کښتۍ ۳۶ سپاره کسان د سیمې یوه نږدې د استوګنې مرکز ته ولېږدول شول.
والین ویلي چې د دې پېښې په اړه به څېړنې د یکشنبې په ورځ پیل شي.
