د اسرائیلو د عربي ګوندونو ایتلاف «ګډ لېست» اعلان کړی چې د بنیامین نتانیاهو سیال، ګادي آیزنکوټ به د دغه هېواد د راتلونکي لومړي وزیر په توګه ولسمشر اسحاق هرتزوګ ته ور وپېژني.
د «ټایمز اف اسرائیل» د راپور له مخې، د «ګډ لېست» درېیو جوړوونکو ډلو په یوه اعلامیه کې ویلي، چې دا پرېکړه «د نتانیاهو او د هغه د حکومت واک ته د بیا رسېدو د مخنیوي لپاره د خلکو غوښتنې ته په ځواب کې» شوې ده.
د راپور له مخې، ټاکل شوې د دغو ګوندونو یو پلاوی نن ماښام (پنجشنبه، د لړم ۱۴مه) د اسرائیلو له ولسمشر اسحاق هرتزوګ سره وګوري او ګادي آیزنکوټ د راتلونکي لومړي وزیر په توګه ور وپېژني.
«ګډ لېست» ویلي، که څه هم آیزنکوټ د نتانیاهو په پرتله د ملاتړ ډېرې ژمنې ترلاسه کړې دي، خو دوی باور لري چې د دواړو ترمنځ د ملاتړ د واټن زیاتول ډېر اهمیت لري.
د دغه ایتلاف په باور، دا اقدام کولای شي د حکومت د بدلون لپاره زمینه برابره کړي او د داسې ائتلافي حکومت د جوړېدو احتمال کم کړي چې نتانیاهو ته به په واک کې د پاتې کېدو لاره هواره کړي.
د اسرائیلو پارلماني ټاکنې تېره اوونۍ ترسره شوې دي. په دغو ټاکنو کې د اوسني لومړي وزیر بنیامین نتانیاهو په مشرۍ ایتلاف ۵۳، د هغه د سیال ګادي آیزنکوټ په مشرۍ د مخالفو ګوندونو ایتلاف ۴۸ او د اسرائیلو عربي ګوندونو ۱۹ څوکۍ ګټلې دي.
خو هېڅ یوه ایتلاف د حکومت جوړولو لپاره اړینې ۶۱ څوکۍ نه دي ترلاسه کړې او اوس اړ دي چې د نورو ګوندونو ملاتړ خپل کړي، څو د حکومت جوړولو لپاره اړین اکثریت ترلاسه کړي.
د «ټایمز اف اسرائیل» د راپور له مخې، د اسرائیلو د راتلونکي پارلمان ۶۷ ټاکل شوي غړي اوس د آیزنکوټ ملاتړ کوي او نوموړی د ملاتړ اکثریت لري؛ خو دا په دې معنا نه ده چې دغه استازي به حتماً د هغه له ایتلاف سره یوځای شي.
د اسرائیلو اوسنی لومړی وزیر بنیامین نتانیاهو په غزه کې د جګړې او له ایران سره د جګړې له امله په خپل هېواد کې هم له پراخو نیوکو سره مخ دی. د راپور له مخې، نوموړی د واک د ساتلو لپاره د خپل سیال په پرتله له کمزوري وضعیت سره مخ شوی دی.
