اطلاعات روز: طالبانو ډلې د راتلونکي کوچني اختر په پار د دریو ورځو لپاره اوربند اعلان او له خپلو جنیګالیو یې غوښتي چې په دغې موده کې ټول هېواد کې خپل تعرضي عملیات ودروي.
د طالبانو ویاند ذبیح الله مجاهد بیګاه (یکشنبه، ۱۹ د غویي) پر خپل ټوېټ دغه خبر خپور او ویلي یې دي چې هېوادوالو ته د ډاډمنې فضا برابرولو لپاره دغه ګام اخلي.
ښاغلي مجاهد په خپل ټوېټ کې خپلو جنګیالیو ته لیکلي: «او که په یادو دریو ورځو کې د دښمن لخوا پرتاسو کوم تعرض او برید وشو، له خپلو ځانونو او سیمو څخه په کلکه ساتنه او دفاع وکړئ.»
د طالبانو د اوربند دغه اعلان کې ویل شوي چې په دغې موده کې طالبان او دولتي ځواکونه باید د یو بل سیمو ته لاړ نه شي.
د طالبانو له دې اعلانه د ملي پخلاینې عالي شورا هرکلی کړی او ویلی یې دي چې د افغانستان اسلامي جمهوریت هم تیاری لري او اعلان به شي.
د ملي پخلاینې عالي شورا ویاند فریدون خوځون بیګاه ناوخته په یو لړ ټوېټونو کې لیکلي : «د اختر ورځو کې د اوربند له اعلانه هرکلی کوو. له دې سره چې دا اعلان د ملي ماتم په درشل او د خپلو زیات شمېر بې ګناه هېوادوالو له لاسه ورکولو وروسته وشو، خو د دې خاورې د نورو انسانانو خوندیتوب لپاره ښه او د ستاینې ګام دی.»
ښاغلي خوځون دغه راز په دوام کې لیکلي، هیله لري چې دغه اعلان تمدید او د رغوونکو او موخیزو خبرو اترو جریان سره دوام پیدا کړي. د ده په وینا، اوربند د ټولو جنګ ځپلو پرګنو غوښتنه ده.
دا په داسې حال کې ده چې وروستیو ورځو کې د هېواد بېلابېلو برخو کې تاوتریخوالی زیات شوی دی. په تېرو څه کم لس ورځو کې په غزني، بغلان، هلمند، کندهار او هرات کې سختو جګړو دوام لرلی دی.
په لومړي ځل ولسمشر اشرف غني د ۱۳۹۷ کال کوچني اختر کې، د روژې له ۲۷مې د اختر تر پنځمې اوربند اعلان کړ. طالبانو هم د دې ګام په هرکلي، یوازې د کوچني اختر درې ورځې اوربند اعلان کړ.
دغه راز طالبانو تېر کال هم د لوی اختر په پار درې ورځې اوربند اعلان کړ. په هغې وخت کې ولسمشر غني هم له امنیتي او دفاعي ځواکونو وغوښتل چې اوربند مراعت کړي.
