سراجالدین حقاني، د طالبانو د کورنیو چارو وزیر، وايي چې دغه ډلې واک ته له رسېدو وروسته پر «عمومي عفوې» ژمن پاتې شوې او هېڅوک یې صحرایي محاکمه نه دی کړی.
حقاني دا څرګندونې نن (چهارشنبه، د زمري ۲۸مه) په هغه مراسمو کې وکړې چې طالبانو په کابل کې د افغانستان د خپلواکۍ د ۱۰۷مې کلیزې په مناسبت جوړ کړي دي.
هغه ادعا وکړه چې افغانستان له څو انقلابونو سره مخ شوی او «هر ځل به نویو حکومتونو غچ اخیستنې ته لاس اچاوه، خو اسلامي امارت عمومي عفوه اعلان کړه او هېڅوک یې صحرایي محاکمه نه کړل.»
د طالبانو د کورنیو چارو وزیر دا ادعا په داسې حال کې کوي چې دې ډلې د تورنو کسانو، په ځانګړي ډول د ښځو، اعدامول او په دورو وهل په عام محضر کې ترسره کړي او د طالبانو سترې محکمې هم د دغو حکمونو د عملي کېدو په اړه رسمي اعلامیې خپرې کړې دي.
همداراز، طالبان د پخواني حکومت د پوځيانو او ملکي کارکوونکو پر وړاندې په پراخو غچ اخیستونکو اقداماتو تورن شوي دي. په افغانستان کې د ملګرو ملتونو د مرستندویه پلاوي (یوناما) دفتر په خپل وروستي راپور کې ویلي چې یوازې د روان میلادي کال په درېیو میاشتو، اپرېل، مې او جون، کې یې د طالبانو له لوري د پخوانیو چارواکو او امنیتي ځواکونو د غړو لږ تر لږه اته د وژنې پېښې، ۲۹ د خپلسرو نیونو او توقیفونو پېښې او د شکنجې پنځه موارد مستند کړي دي.
له بلې خوا، په تېرو پنځو کلونو کې لسګونه خبریالان د دغې ډلې له خوا یوازې د خبریالۍ او راپور ورکولو له امله نیول شوي او شکنجه شوي دي.
