الماني رسنیو راپور ورکړی چې د افغانستان ۳۰ کډوال د یوه چارټر الوتنې له لارې د لایپزیګ له هوايي ډګر څخه کابل ته انتقال شوي دي.
«بیلد» ورځپاڼې راپور ورکړی چې دغه کډوال نن سهار (سهشنبه، د وږي ۳مه) له جرمني څخه ایستل شوي دي.
د دې رسنۍ د راپور له مخې، په دې الوتنه کې یو شمېر هغه کډوال هم شامل وو چې «جرمي سابقه» نه لري او په جبري ډول ایستل شوي دي.
د دغو کډوالو د لېږدوونکې الوتکې له پورته کېدو مخکې، د کډوالو د حقونو یو شمېر فعالانو د لایپزیګ په هوايي ډګر کې اعتراضي غونډه وکړه.
په خپرو شویو ویډیوګانو کې لیدل کېږي چې دوی شعارونه ورکوي: «د شړلو پر وړاندې، کډوالو ته ښه راغلاست.»
دوی د طالبانو تر واک لاندې افغانستان ته د کډوالو د جبري شړلو په اړه د جرمني د حکومت سیاست غندلی او د دې بهیر د درولو غوښتنه یې کړې ده.
د جرمني حکومت له طالبانو سره د ډیپلوماتیکو اړیکو له ټینګولو او د دې ډلې د دوو ډیپلوماتانو له منلو وروسته، افغانستان ته د کډوالو د شړلو لړۍ زیاته کړې ده.
په پیل کې ټاکل شوې وه چې یوازې هغه کډوال وشړل شي چې د جنسي تېري، وژنې، د ملي امنیت د ګواښ او له نشهیي توکو سره د تړلو جرمونو په څېر درنو جرمونو محکوم شوي وي. خو برلین په دې وروستیو کې پرېکړه کړې چې هغه کډوال چې هېڅ جرمي سابقه نه لري هم له جرمني څخه وشړي.
