په کابل کې ځايي سرچینې وايي چې طالبانو د نفتو او ګازو د صنعت یو سوداګر، چې «نقیبالله عليخېل» نومېده، وژلی دی.
د سرچینو په وینا، دغه سوداګر د سهشنبې شپې شاوخوا ۱۰ بجې (د وږي ۳مه) د کابل ښار د څلورلارې قمبر په فامیلي زورآباد سیمه کې، د افغانستان د نظامي پوهنتون مخې ته، چې مخکې د «مارشال فهیم دفاعي پوهنتون» په نوم یادېده، وژل شوی دی.
د سرچینو د معلوماتو له مخې، په دې سیمه کې د نقیبالله عليخېل اړوند د ګازو له یوه موټر سره د نفتو د موادو د لېږدونکي بل موټر ټکر شوی و. دواړه لوري په شخړه بوخت وو چې د نظامي پوهنتون له مخې له پوستې څخه د طالبانو یو سرتېری راغی او په موضوع کې یې مداخله وکړه.
سرچینې ادعا کوي چې دغه طالب سرتېري پرته له کوم دلیل او له کومې شخړې پرته، نقیبالله له موټر څخه راکوز کړ او له شاوخوا درې یا څلور مترو واټن څخه یې د «M4» ډوله وسلې په وسیله پرې ډزې وکړې او ویې واژه.
د سرچینو په وینا، طالبانو ویلي چې پر دغه سوداګر ډزې کوونکی کس «لېونی» و؛ خو په کابل کې د طالبانو پولیسو تر اوسه په رسمي ډول په دې اړه څه نه دي ویلي.
سرچینې وايي چې نقیبالله عليخېل د میدان وردګو ولایت د جلریز ولسوالۍ اصلي اوسېدونکی و او اوس مهال په کابل کې اوسېده.
د سرچینو د راپور له مخې، د دغه سوداګر جنازه مخکې خاورو ته سپارل شوې او د فاتحې مراسم به نن له غرمې وروسته ترسره شي.
