په بغلان کې د طالبانو امنیې قوماندانۍ اعلان کړی چې د دې ولایت د دند غوري ولسوالۍ کې د یوه مسافر وړونکي بس او شخصي موټر د ټکر له امله یوه ښځه مړه شوې او پنځه نور کسان ټپیان شوي دي.
دې قوماندانۍ په ایکس کې د یوې خبرپاڼې په خپرولو سره ویلي چې پېښه نن (چهارشنبه، د تلې لومړۍ نېټه) د سهار شاوخوا ۳:۳۰ بجې د دند غوري ولسوالۍ اړوند د «کوچه اربابها» په سیمه کې رامنځته شوې ده.
په خبرپاڼه کې راغلي چې په دې پېښه کې یو «۳۰۳» ډوله مسافر وړونکی بس چې له مزار شریف څخه د پلخمري پر لور روان و، له یوه شخصي «فیلډر» موټر سره ټکر کړی دی.
د پېښې په پایله کې یوه ښځه مړه شوې او پنځه نور کسان، چې د فیلډر موټر چلوونکی او سپرلۍ هم پکې شامل دي، ټپیان شوي دي.
د پېښې مړی او ټپیان د بغلان مرکز پلخمري مرکزي روغتون ته لېږدول شوي دي.
تر اوسه د دې خونړۍ پېښې اصلي لامل او مسؤل لوری نه دی معلوم شوی.
وروسته له هغه چې د هېواد پر لویو لارو ترافیکي پېښې زیاتې شوې، چې ډېری یې د تېز سرعت او د ترافیکي قوانینو د نه مراعت له امله رامنځته کېږي، د طالبانو مشر هبتالله اخوندزاده امر کړی و چې د ترافیکي پېښو عاملین دې وپېژندل شي، ونیول شي او محاکمه دې شي، او د قربانیانو حقونه دې ورکړل شي.
د دغه فرمان له صادرېدو نږدې یوه میاشت وروسته، په داسې حال کې چې په بېلابېلو سیمو کې څو ترافیکي پېښې د لسګونو کسانو د مړینې او ټپي کېدو سبب شوې دي، طالبانو تر اوسه د کومې قضیې د تعقیب خبر نه دی ورکړی.
