د هسپانیې د «کاستیلا-لامانچا» سیمې سیمهییزو چارواکو اعلان کړی چې د دوو چټکو اورګاډو د ټکر له امله د مړو شمېر ۶۴ تنو ته رسېدلی دی.
د رویټرز د راپور له مخې، دغه پېښه نن (چهارشنبه، د عقرب ۶مه) له مادرید څخه د هسپانیې په سوېل کې د اندلس سیمې مرکز او تر ټولو لوی ښار سویل ته پر غځېدلې لار، د تولدو ایالت په «ارودا» سیمه کې رامنځته شوې ده.
د هسپانیې لومړی وزیر پدرو سانچز اوس د پېښې ځای ته تللی او خبریالانو ته یې ویلي: «ټوله هسپانیه په ویر کې ده.» هغه درې ورځې ملي ماتم اعلان کړی دی.
سانچز زیاته کړې چې د حکومت لومړیتوب د پېښې قربانیان او د هغوی کورنۍ دي. نوموړي هیله څرګنده کړې چې د ژوندي پاتې شویو کسانو د موندلو لپاره به تر خپله وسه هڅې وکړي.
هغه ویلي، د حکومت دویم لومړیتوب د پېښې د لامل معلومول دي او که کومه بېغوري یا غفلت شوی وي، هغه به په ډاګه شي.
په دې پېښه کې د دولتي شرکت «رنفه» یو چټک اورګاډی، چې ۳۹۷ سپرلۍ یې لرلې، له یوه درېدلي چټک اورګاډي سره ټکر شوی چې د خصوصي شرکت «ایریو» اړوند و او ۱۴۷ سپرلۍ یې لرلې.
د هسپانیې د ترانسپورټ وزیر اسکار پوئنته د پېښې د لامل په اړه ویلي چې «د کمپیوټري اړیکو په سیستمونو کې د ستونزې له امله د اورګاډو حرکت په اتومات ډول درېدلی و».
هغه زیاته کړې: «وروسته، د شته پروتوکولونو خلاف او سره له دې چې سور څراغ بل و، د رنفه د چټک اورګاډي د بېرته حرکت لپاره ناسمه پرېکړه وشوه. اورګاډي خپل مسیر ته دوام ورکړ، تر دې چې له هغه درېدلي اورګاډي سره ټکر شو چې مخې ته یې پروت و.»
د پېښې په ځای کې د ژغورنې عملیات لا هم روان دي او احتمال شته چې د مړو شمېر نور هم لوړ شي.
دا په روان میلادي کال کې په هسپانیه کې د اورګاډو دویمه خونړۍ پېښه ده. د روان کال په جنوري کې هم پر ورته لار یوه ورته پېښه شوې وه چې ۴۶ کسان پکې مړه شوي وو.
