د افغانستان پخواني ولسمشر حامد کرزي د ماشومانو نړیوالې ورځې په مناسبت د نجونو او هلکانو لپاره زدهکړو ته له کوم محدودیت پرته د لاسرسي غوښتنه کړې ده.
کرزي نن (جمعه، د لړم ۲۹مه) په خپله خپره کړې اعلامیه کې ویلي، د ماشومانو نړیواله ورځ په داسې حال کې نمانځو چې په افغانستان کې شاوخوا څلور میلیونه ماشومان له سختې خوارځواکۍ سره مخ دي او د لومړنیو زدهکړو د عمر تر نیمایي ډېر ماشومان له زدهکړو بېبرخې دي.
هغه زیاته کړې، د ماشومانو نړیواله ورځ د ماشومانو د زدهکړو، روغتیا او خوندیتوب په برخه کې د پاملرنې او رسېدنې او همدارنګه د هغوی د بنسټیزو حقونو د رعایتولو په اړه د ټولنې ستر مسؤلیت را یادوي.
د پخواني ولسمشر په وینا، بېوزلي او محرومیت د افغانستان ماشومان د خوارځواکۍ او بېسوادۍ له جدي ګواښونو سره مخ کوي، چې نه یوازې د ماشومانو، بلکې د کورنیو، ټولنې د روغتیا او امنیت او د هېواد راتلونکې هم ګواښي.
هغه ټینګار کړی: «افغانستان هغه مهال له دې خطرونو څخه ژغورل کېدای شي او د ابادۍ او غوړېدا پر لور تللی شي چې د ماشومانو روغتیا او امنیت یې تضمین وي او د زدهکړو دروازې یې د نجونو او هلکانو پر مخ له هر ډول محدودیت پرته پرانیستې وي.»
طالبانو افغانستان ته تر بیا واکمنېدو وروسته له شپږم ټولګي پورته د نجونو پر زدهکړو بندیز لګولی او د هغوی پر مخ یې د ښوونځیو او پوهنتونونو دروازې تړلې دي.
د طالبانو دغو اقداماتو په افغانستان کې د زدهکړو پر کیفیت او لاسرسي هم اغېز کړی او ډېر ماشومان په داسې حال کې لومړنۍ زدهکړې بشپړوي چې د لوستلو، لیکلو او حساب لومړني مهارتونه یې په سمه توګه نه وي زده کړي.
