اطلاعات روز: شرکت برق‌رسانی افغانستان (برشنا) اعلام کرد که برق وارداتی تاجیکستان به افغانستان از ۳۵۰ میگاوات به ۴۰ میگاوات کاهش یافته است.
وحیدالله توحیدی، سخن‌گوی شرکت برشنا به روزنامه اطلاعات روز گفت که این اقدام تاجیکستان به دلیل کمبود منابع آبی آن کشور صورت گرفته است.
آقای توحیدی همچنان گفت که برق وارداتی تاجیکستان حوالی ساعت ۷:۳۰ دقیقه‌ی صبح امروز (دوشنبه، ۶ اسد) به ۴۰ میگاوات کاهش یافته است.
به گفته‌ی او، از برق وارداتی تاجیکستان ولایت‌های کابل، ننگرهار، لغمان، لوگر، پکیتا، خوست، پروان، پنجشیر، کاپیسا، بغلان و قسمتی از ولایت قندوز استفاده می‌کردند که با کاهش واردات برق، برق ولایات یادشده نیز قطع می‌شود.
در همین حال، سخن‌گوی شرکت برشنا گفت که افغانستان برای واردات برق از ازبیکستان، با مقام‌های آن کشور وارد گفت‌وگو شده و احتمال دارد تا ظهر امروز برق ازبیکستان با ظرفیت ۴۵۰ میگاوات وصل شود.
آقای توحیدی افزود که تا زمان وصل شدن برق وارداتی ازبیکستان، کتگوری نخست مصرف‌کنندگان برق در کابل که شامل شفاخانه‌ها، ادارات امنیتی و ادارات دولتی می‌شود، به‌گونه‌ی نوبتی از تولیدات منابع داخلی برق استفاده خواهند کرد.