سفیر افغانستان در تاجیکستان: غنی، محب و فضلی باید توسط پولیس انترپول بازداشت شوند

محمدظاهر اغبر، سفیر افغانستان در تاجیکستان می‌گوید که محمداشرف غنی، رییس‌جمهوری پیشین، حمدالله محب، مشاور پیشین امنیت ملی و فضل‌محمود فضلی، رییس پیشین دفتر ریاست‌جمهوری به‌اتهام سرقت بیت‌المال باید توسط پولیس انترپول بازداشت شوند.

آقای اغبر امروز (چهارشنبه، ۲۷ اسد) در یک نشست خبری در شهر دوشنبه، پایتخت تاجیکستان گفته است که این افراد پس از بازداشت، باید توسط دادگاه‌های بین‌المللی محاکمه شوند.

او تأکید کرده است که با بازداشت و محاکمه‌ی غنی، محب و فضلی، ثروت مردم هم باید برگشتانده شود.

همچنین سفیر افغانستان در تاجیکستان گفته است که براساس مفاد قانون اساسی، در نبود و فرار محمداشرف غنی از کشور، امرالله صالح سرپرست ریاست‌جمهوری است.

او تأکید کرده است که مطابق «معاهدات جهانی، نماینده‌ی رسمی افغانستان در سازمان ملل متحد برحال بوده و پرچم افغانستان به عنوان هویت ملی کشور در تمام کشورهای جهان به اهتزاز است». او خواستار ثابت نگهداشتن این پرچم در سایر کشورهای جهان شده است.

همچنین براساس اعلام سفارت افغانستان در تاجیکستان، این سفارت تصویر محمداشرف غنی را هم پایین کشیده و عکس امرالله صالح را به عنوان سرپرست ریاست‌جمهوری نصب کرده است.

محمداشرف غنی سه روز پیش (یک‌شنبه، ۲۴ اسد) به‌دنبال حضور طالبان در اطرف شهر کابل، کشور را ترک کرد. پس از آن نیروهای طالبان وارد کابل شدند و ارگ ریاست‌جمهوری را در کنترل گرفتند.