د مدني ټولنو بنسټونو په یوه ګډه اعلامیه کې د کابل په لویدیځ کې پروني بریدونه یو جنایت بللی او له ملګرو ملتونو یې غوښتي چې «دا جنایت د هزاره ګانو د نسل وژنې په توګه وپيژني.»
دغو بنسټونو پر «ممتاز» ښوونیز مرکز او د «عبدالرحیم شهید» ښوونځي باندې برید په کلکو ټکو غندلی او ویلې یې دي چې پر ښوونیزو مرکزونو برید او د هزاره ګانو معلوم داره وژنه «نسل وژنه» او د بشریت ضد جنایت دی.
د مدني ټولنو بنسټونو په افغانستان کې د ملګرو ملتونو د بشري حقونو له ځانګړي راپور ورکوونکي څخه غوښتي چې د پرونۍ حملې په اړه جدي څېړنه وکړي او دغه راپور ملګرو ملتونو په ځانګړې توګه د ملګرو ملتونو امنیت شورا ته وړاندې کړي.
دغه بنسټونو د ملګرو ملتونو پر امنیت شورا غږ کړی چې « د دغه ستر جنایت په اړه ځانګړې غونډه جوړه کړي او د داسې بشري ناورین د بیا تکرار د مخنیوي لپاره جدي پرېکړه وکړي.»
د مدني ټولنو بنسټونه له ملګرو ملتونو څخه غواړي چې « دا جرم د هزاره ګانو د نسل وژنې په توګه وپیژني او تر شا یې چې کومې ترهګرې ډلې لاس لري تر جدي څار لاندې ونیسي.»
دوی ټینګار کړی چې د ملګرو ملتونو په ګډون نړیوال سازمانونه او نړیواله ټولنه باید د کابل په لویدیځ کې د بریدونو پر وړاندې چوپه خوله پاتې نه شي او « پر ترهګرو ډلو فشار راوړي چې په راتلونکي کې د ورته جنایتونو مخه ونیول شي».
د کابل لوېديځ کې د هزاره ګانو سيمه پرون سهار د درېو جلا جلا چاودنو شاهده وه. په دغه چاودنو کې په یوه دولتي ښوونځي اوښوونیز مرکز کې زده کوونکي په نښه شول
