د سمنګان ولایت طالب امنیتي چارواکي وايي، د دغه ولایت په مرکز کې یوه سړي خپله مېرمن په چړو وهلې او وژلې یې ده.
دا پېښه تېره شپه (جمعه، ۳۰ د ثور) د ايبک په ښار کې رامنځته شوې ده.
باختر دولتي خبري آژانس سمنګانو ولايت کې د طالبانو د امنيې قوماندانۍ د مسوولينو له خولې خبر ورکوي چې دغه سړي خپله ميرمن په چړو وژلې او دوه ماشومان يې ټپيان کړي دي.
ويل کيږي چې قاتل له ساحې څخه تښتيدلى او د نيولو لپاره يې هڅې روانې دي.
ددې پیښې د علت په اړه څه نه دي ویل شوي. په دې وروستیو کې په هېواد کې کورنی تاوتریخوالی زیات شوی. اقتصادي ستونزې او بې روزګاري د دغه وضعیت یو له لاملونو څخه ګڼل کېږي.