اطلاعات روز: په پکتیکا او خوست ولایتونو کې د زلزلې قربانیانو لپاره د نړیوالو خیریه بنسټونو ترڅنګ د هیواد په بېلابېلو ولایتونو کې داخلي خیریه بنسټونو له لوري هم له خلکو نغدي مرستې راټولې شوې خو د پکتیکا ولایت زلزله خپلي خلک بیا وايي تر اوسه دوی ته نه دي رسېدلي.
د دغه ولایت د ګیان ولسوالۍ اوسېدونکي میراجان اطلاعات روز سره په خبرو کې وویل، چې تېره ورځ یو خیریه بنسټ په کمه اندازه خوراکي توکي په څو نومونو خلکو ته ورکول.
هغه زیاته کړه چې د یاد بنسټ غړو څو کورنیو ته یوه بسته توکي د درې بنسټونو په نوم ورکول چې نوموړي دا ښکاره فساد وباله.
هغه وايي: «زمونږ کلي ته پرون د Muslim help خصوصي بنسټ کسان چې د مرستو په بهانه راغلي و، څو کورنیو ته یې توکي وویشل او د Didza او Black burn په نومونو یې بېل بېل لباسونه واغوستل او په انګلیسي به یې په بېلابېلو معلوماتو ورکولو ویډیوګانې ثبت کولې، بیا مونږ ورته وویل چې ستاسو له دې کاره هدف څه شی دی او څه غواړئ، خو وروسته چې پرې پوی شو نو په مرستو کې ښکاره فساد و.»
په همدې حال کې د برمل ولسوالۍ اوسېدونکي سلېمان هم په ورته فساد نیوکه وکړه او ویې ویل چې د خلکو له بد وضعیت ځینې خیریه بنسټونه ناوړه استفاده کوي او د زلزله ځپلو په نوم ټولې کړې پیسې شخصي جیبونو ته ځي.
نوموړي وویل: «د برمل په خلکو خورا بد وضعیت راغلی، کورونه یې نړیدلي او خلک یې له لاسه ورکړي، خو ځینې خلک په یو او بل نومونو فساد کوي بنسټونه یې جوړ کړي او زلزلې ته ځانګړې شوې هغه پیسې چې په ښارونه کې ټولې شوې تر اوسه له سېلاب خیریه بنست، عطا او ځینو نورو علاوه یوه روپۍ هم مونږ ته نه ده را رسېدلې.»
په ورته مهال بیا د خوست ولایت یو تن قومي مشر حاجي عبیدالله د طالبانو له ولایتي مسوولینو غوښتنه وکړه، چې د کېدونکو مرستو لپاره پلان چمتو تر څو په منظم او له فساده په پاک ډول اړمنو ته ورسیږي.
هغه زیاته کړه چې اوس مهال د خوست سپېرې او د پکتیکا ولایت زلزله ځپلو لپاره په زیاته کچه مرستې راغلي خو تر اوسه ورته منظم پلان نه دی چمتو کړی.
نوموړي داسې وویل: «مونږ له طالبانو غوښتنه کوو، چې د کېدونکو مرستو ښه مدریت وکړي تر څو له ستونزو پرته اړمنو او زلزله ځپلو کورنیو ته مرستې ووېشل شي. مونږ په رسنیو کې وینو جې هره ورځ په زیاته کچه مرستې را روانې دي خو د منظم ویش لپاره یې پلان نه دی جوړ شوی.»
بلخوا د پکتیکا ولایتي مسوولینو تېره ورځ ویلي و، چې د مرستو ویش لپاره یې په ولایتي کچه کمېټه ټاکلې او د فساد لپاره به هیچاته اجازه ور نه کړي.
دا په داسې حال کې ده، چې په دې وروستیو کې د پکتیکا او خوست ولایتونو زلزله ځپلو کورنیو لپاره په شویو مرستو کې د پراخه فساد اندېښنه څرګنده شوې.
په کور دننه او د هندوستان، ایران، متحده عربي امارت، ترکمنستان او ځینو نورو هیوادونو له لوري تر اوسه په زیاته کچه لومړنۍ مرستې راغلي دي.
