کندهار ښار کې د طالبانو ځايي مسوولين د دغه ولايت د ښار په یوولسمه حوزه کې د لاسي بم چاودنې له امله د دوو ماشومانو د ټپي کېدو خبر ورکوي.
کندهار کې د طالبانو د يوولسمې حوزې امر حاجي ملا نصیب وايي، دغه پېښه پرون (چهارشنبه، ۱۲ د زمري) له غرمې وروسته رامنځته شوې او پر مهال يې دوه ماشومان ټپیان شوي دي.
دوی زياتوي، دغه ماشومانو په لاسي بم لوبې کولې چې ناڅاپي پرې بم چاونه کړې ده.
د هغه په وينا، په دغه پېښه کې ټپي شوي ماشومان د خپلو کورنيو له لوري روغتون ته انتقال شوي او اوس مهال يې روغتیايي حالت د ډاډ وړ دی.
د تېرې جګړې د پاتې شونو له امله د روان کال په جريان کې لسګونه داسې پېښې رامنځته شوي چې ډیری قربانیان یې ماشومان دي.
د کندهار اوسېدونکي د طالبانو له حکومت او ماين پاکۍ له موسېساتو غواړي ترڅو په ښار او ولسواليو کې له تېرو جګړو پاته شوي چاوديدونکي توکي خنثی او ټول کړي.