اطلاعات روز: لوګر کې ځایي سرچینې وایي، د دې ولایت په مرکز پل عالم اړوند «پړاو» او «التمور» سیمو کې ناپیژانده کسانو په دوو جلا پیښو کې یو ټکسي چلوونکی او بل ځایي کس په ډزو وژلي دي.
یوې ځايي سرچینې د نوم نه یادولو په شرط اطلاعات روز ته وویل، چې تېره ورځ (سې شنبه، ۱۸ د زمري) ماښام مهال د پل عالم اړوند په «حصارک» کلي کې د ابراهیم په نوم یو ټکسي چلوونکی خپل کور ته نږدې په ډزو سره وژل شوی دی.
د سرچینې په حواله چې وژل شوي کس ټکسي چلوله، ماښام مهال کور ته پر لاره ورباندې ناپیژانده کسانو ډزې کړي او وژلی یې دی.
په همدې ورځ یو بل کس هم په مرموز ډول وژل شوی، اطلاعات روز ته د رسېدلو معلوماتو له مخې چې دغه پېښه د «التمور» په سیمه کې رامنځته شوې، خو د نوموړي د وژل کېدو کره وخت او لامل نه دی څرګند چې یاد کس څه کاره و او د چا له خوا په نښه شوی دی.
ځایي طالب چارواکو تر اوسه په دې اړه رسنیو ته څه نه دي ویلي.
لوګر او ورڅېرمه ولایتونو کې د غلاوو، هدفي وژنو او نورو بېلابېلو امنیتي او جنايي پېښو خلک سخت اندېښمن کړي او د طالبانو له مسوولو امنیتي کسانو غوښتنه کوي، چې د خلکو د سر او مال ساتنه وکړي.
