اطلاعات روز: په ملګرو ملتونو کې د افغانستان استازي نصیر احمد فایق د دغه سازمان له غړو هېوادونو وغوښتل چې د هزاره ګانو د هدفي وژنو د مخنیوي لپاره دې عملي اقدامات ترسره کړي او د بشري حقونو څخه د ټولو جدي سرغړونو د څېړلو او راپور ورکولو په موخه دې یو کمېسیون جوړ کړي.
نوموړي د ملګرو ملتونو د عمومي سازمان د ټولنيزو، بشري او فرهنګي چارو کمېټې ته په خپله وينا کې د کابل په لوېديځ کې پر کاج ښوونیز مرکز ځانمرګي برید ته په اشارې سره وویل، چې د دا ډول بريدونو ترسره کیدل د یوه توکم د نجونو زده کړو سره ښکاره دښمني په ډاګه کوي او د امنیت په تامین کې یې دا د طالبانو ناکامي وبلله.
فایق ویلي، چې دا کړنې د بشري حقونو د نړیوالو اصولو څخه سرغړونه ده او باید د نسل وژنې د جرمونو په توګه وڅیړل شي.
هغه زیاته کړه: «زه د ملګرو ملتونو له غړو هېوادونو څخه غوښتنه کوم چې د هزاره ګانو د هدفي وژنو د مخنیوي لپاره د حقیقت موندنې کمیسیون په جوړولو سره عملي ګامونه پورته کړي، ترڅو د بشري حقونو د ټولو جدي سرغړونو په ګډون د هزاره ګانو د نسل وژنې، جبري مهاجرت او له محاکمې پرته وژنو په اړه څېړنې او راپور ورکړي.
فايق په افغانستان کې د بشري حقونو وضعيت «خورا د اندېښنې وړ» بللی او ویلي یې دي، چې د طالبانو له لوري د بشري حقونو د سختو او پرله پسې سرغړونو ټکان ورکوونکي راپورونه شته، چې پکې «بې له محاکمې وژنې، شکنجه، سخت چلند، نيول او د پخوانيو امنيتي ځواکونو، ژورنالستانو، د بشري حقونو مدافعینو او د مقاومت جبهې سره په اړیکو تورن کسان شامل دي.»
ځواکونه، ژورنالیستان، د بشري حقونو مدافعین او خلک د مقاومت له جبهې سره په اړیکو تورن دي.
هغه وايي، د بدخشان، بغلان، پنجشېر، سرپل او تخار په ګډون د افغانستان په بېلابېلو ولايتونو کې له محاکمې پرته د جګړې بنديانو د شکنجو، وژلو او د ځينو قومونو د جبري مهاجرت مستند راپورونه شته دي.
فايق ویلي، چې دا کړنې له بشري حقونو څخه جدي سرغړونې او جنګي جنايتونه دي.
هغه د ښځو او نجونو د بشري حقونو وضعیت خورا د اندېښنې وړ بللی او ویلي یې دي، چې اوس مهال په افغانستان کې جنسیتي توپیر (جندر اپارتاید) شتون لري.
په ملګرو ملتونو کې د افغانستان استازي دغه راز د ملګرو ملتونو له ټولو غړو هېوادونو او نړيوالې ټولنې غوښتي چې د افغانستان د خلکو تر څنګ ودرېږي او هېر يې نه کړي.
فايق ویلي، نړيواله ټولنه بايد د افغانستان د ټولو خلکو په تېره بيا د ښځو او نجونو د بشري حقونو د پراختيا په برخه کې د طالبانو لخوا د شویو ژمنو د عملي کولو په موخه پر دوی فشار راوړي.
هغه زیاته کړې، نړیواله ټولنه باید د قانون د حاکمیت، عدالت او د خلکو د ارادې پر بنسټ د یوه ټول شموله او حساب ورکوونکی جوړښت د رامنځته کولو لپاره پر طالبانو د فشار راوړلو لپاره له ټولو شته وسیلو کار واخلي.
