اطلاعات روز: د سولې ولسي حرکت غړو، چې د ننګرهار له مرکز جلال اباده یې کابل ته پلی تګ پیل کړ وایي، موخه یې د جګړې له ښکیلو خواوو د اوربند غوښتنه او په هیواد کې د روانې جګړې دریدل دي.
د سولې ولسي حرکت یو غړي عطاالله شګیوال نن (چهارشنبه، ۱۴ لړم) اطلاعات روز ورځپاڼې ته وویل، تر کابله به پلی مزل وکړي او هلته به د امریکا سفارت مخې ته پرلت ووهي، ترڅو ښکېل لوري جګړه ودروي. شګیوال زیاته کړه: «د ننګرهار له مختلفو ولسوالیو راسره په دې حرکت کې سلګونه ځوانان او قومي سپین ږیري ملتیا کوي او کابل ته به ځو او هلته به د امریکا سفارت مخې ته پرلت وهو.»
د سولې ولسي حرکت غړي داسې مهال کابل ته د سولې په موخه پلی مزل پیلوي، چې نږدې دوه میاشتې کیږي چې د حکومت او طالب استازو ترمنځ قطر کې خبرې روانې دي، خو تراوسه نه یواځې کومې پایلې ته نه دي رسیدلي بلکې جګړو لاپسې زور اخیستی.
