اطلاعات روز: د افغانستان د سولې په چارو کې د امريکا پخواني ځانګړي استازي زلمي خليلزاد داعش د طالبانو او نړيوالې ټولنې ګډ دښمن بللی او ويلي يې دي چې د داعش پر خلاف همکاري «کېدلای شي چې د راتلونکو اړيکو يوه مهمه برخه وي.»
ده چې له طالبانو سره يې د دوحې تړون لاسليک کړی زياته کړې، چې په اوسنيو انتخابونو کې د دې تړون بشپړ پلي کول «تر ټولو غوره» انتخاب دی چې د افغانانو او نړيوالې ټولنې ټولې انديښنې ځوابوي. د دوحې تړون له افغانستانه د بهرنيو ځواکونو د وتلو او د دې هيواد د دولت پاشل کېدلو ته زمينه برابره کړه.
خليلزاد تېره شپه (سېشنبه، ۲۵ د سلواغې) په يوه ټويټ کې ليکلي: «داعش د طالبانو او نړيوالې ټولنې ګډ دښمن دی. د داعش پر خلاف همکاري کېدلای شي چې د راتلونکو اړيکو مهمه برخه وي».
که څه هم طالبانو په وار وار په افغانستان کې د دې ډلې له شتونه انکار کړی دی، مګر ځينې وختونه په ځينو سيمو په ځانګړې توګه کابل کې د دې ډلې پر ضد د عملياتو خبر ورکړل شوی.
د طالبانو په وينا د دې دواړو اړخونو تر منځ وروستۍ نښته د کابل ښار په کارته نو سيمه کې د دوشنبې په شپه وشوه.
د طالبانو تر واکمنېدو وروسته، داعش ډلې پر ملکي وګړو او ډيپلوماټيکو سيمو د خونړيو بريدونو مسووليتونه منلي دي.
په وروستيو کې راپور ورکړل شو چې سعودي عربستان د امنيتي ګواښونو له کبله په کابل کې خپل سفارت تړلی دی.
په همدې حال کې د ټوليز امنيتي تړون د سازمان د ګډې قومندانۍ رييس آناتولي سيدوروف ويلي، چې د داعش جنګياليو شمېر ۶ زره او ۵۰۰ ته رسېدلی دی چې څلور زره يې د تاجکستان پولې ته څيرمه مېشت دي.
د تاس خبري اژانس له راپور سره سم، نموړي تېره ورځ يوې خبري غونډه کې ويلي چې د داعش د خراسان څانګې غړي زيات شوي دي.
د ده په وينا، د داعش تر څلور زره زيات جنګيالي د تاجکستان د پولې په اوږدو کې په بدخشان، کندز او تخار ولايتونو کې مېشت شوي دي.
سيدوروف ويلي، چې د مرکزي اسيا لپاره تر ټولو لوی ګواښ هغه بېلابېلي افراطي ډلې دي چې په افغانستان کې مېشتي دي.