اطلاعات روز: د ختیځو ولایتونو ښوونکو نن (پنج شنبه، ۲ سلواغې) د یوې اعتراضیه ناستې پر مهال پر پوهنې وزارت نیوکه وکړه چې له ښوونکو سره د استوګنې د نمرو د ورکړې او د معاشونو د لوړیدو ژمنې کړې وې، خو تراوسه یې یوه هم نه ده عملي شوې.
خیتځ کې د ښوونکو د حق غوښتنې ټولنې مشر عبدالطیف مل شینواری اطلاعات روز ورځپاڼې سره په خبرو کې د ښوونکو د ګمارل کیدو په پروسه هم نیوکې وکړې او وویل، څه ډول چې لازمه په یاده پروسه کې روڼوالی په پام کې نه نیول کیږي.
د شنیواري په وینا، په ننګرهار او د ختیځ په یو شمیر نورو ولایتونو کې چې کوم ښارګوټي چې د ښوونکو لپاره ځانګړي شوي وو، اوسمهال د غصب له ګواښ سره مخ دي.
شینواری زیاتوي: «ښوونکو سره دنمرو د ورکړې ژمنې شوي خو د نورو ولایتونو سربیره په ختیځو ولایتونو او په خاص ډول ولسوالیو کې تراوسه ښوونکو ته نمرې نه دي ورکړل شوي، مونږ د نمرو د ورکړې غوښتنه کوو.»
یو شمیر نور ښوونکي د پوهنې وزارت مسولین په بې پروایي تورنوي او وایي، د دوی ستونزو ته یې په وخت رسیده ګي نه ده کړې، چې له امله یې دوی له کړاو سره مخ دي.
د کونړ ولایت د ښوونکو په نماینده ګۍ سید رقیب اطلاعات روز ورځپاڼې سره په خبرو کې له پوهنې وزارت د ښوونکو د تنخواوو د لوړیدو، د نمرو د ورکړې او د تقاعد په برخه کې د اسانتیاوو د رامنځته کیدو تر څنګ د ښوونکو د ظرفیت لوړیدو غوښتنه هم وکړه.
هغه زیاته کړه: «مونږ ته باید د تقاعد په برخه کې اسانتیاوې رامڼخته شي او همداراز د کورونو لپاره نمرې راکړل شي که چیرې حکومت زمونږ غوښتنې ونه مني مونږ به مدني حرکتونه پیل کړو.»
بل لور ته د پوهنې وزارت مسولین وایي، د هیواد په یو شمیر ولایتونو کې ښوونکو ته د نمرو د ویش لړۍ پیل کړې چې دا لړۍ به په نیږدې راتلونکې کې په ختیځو ولایتونو کې هم پیل شي.
د پوهنې وزارت ویاندې نیجیبې ارین اطلاعات روز ورځپاڼې ته وویل، که چیرې دملکي مامورینو تنخواوې لوړیږي نو ښوونکي به هم له پامه نه غورځول کیږي.
ارین زیاته کړه: «د هیواد په ټولو ولایتونو کې د ښوونکو د نمرو دویش لړۍ پیل شوې او هو ورته ښارګوټي ځانګړي شوي دي او هم مو د ښوونکو د معاشاتو ستونزه له اړونده ادارو سره شریکه کړې.»
د ختیځ د نورو ولایتونو سربیره په ننګرهار کې د ښوونکو کمبود بل هغه ستونزه ده چې، له امله یې زده کوونکي له ګڼو ستونزو سره مخ کړي دي.
د دې ولایت د پوهنې ریاست د مالوماتو له مخې اوسمهال د ننګرهار په ټولو ښوونځیو کې شاوخوا اووه زره ښوونکو ته اړتيآ لري.
