اطلاعات روز: د ايران د استازو مجلس رييس محمد باقر قاليباف له طالبانو غوښتي چې له هلمند سيند څخه د هغه هيواد د حقابې په تأمينولو دې د ايران او افغانستان په اړيکو کې د يوې «جدي ستونزې» مخه ونيسي.
نوموړي نن (يکشنبه، ۳۱ د غویي ) د ايران د استازو مجلس په غونډه کې ويلي، چې د هلمند د حقابې پر سر توافق د افغانستان او ايران د ګاونډيتوب یو عالي تاريخ دی.
قاليباف زياته کړې چې د دې هوکړې بشپړ او دقيق تطبيق د دواړو ملتونو په ګټه او د متقابلو اړخونو د ګټو تضمين کوي، همدا راز «د افغانستان د لوېديځ او ايران د ختيځ د اقليمي، جغرافيايي او ولسي وضعيت» ساتنه کوي.
د ايران د استازو مجلس رييس ټينګار کړی چې د هلمند د حقابې په اړه سترګې نشي پټولی.
ده زياته کړې: «د افغانستان له مسوولينو غواړم چې په دې اړه دې د ايران د اسلامي جمهوريت مثبتې ارادې ته رغنده ځواب ووايي او په افغانستان کې د اوبو کافي زېرمو ته په پام سره دې د دوو هيوادونو تر منځ د جدي ستونزې د را پيدا کېدو مخه ونيسي.»
ايراني چارواکي د حقابې د نه تأمينېدو په صورت کې طالبانو ته اخطارونه ورکوي.
خو طالبان وايي، چې د هلمند د اوبو په اړه د ۱۳۵۱ کال تړون ته ژمن دي، مګر د وچکالۍ له امله کافي اوبه نشته.
ايراني چارواکي ټينګار کوي چې د اوبو د نشتون په اړه د طالبانو ادعا بايد د ګډ تخنيکي پلاوي له لوري وارزول شي.
په کابل کې د ايران استازي او سفير حسن کاظمي قمي په تازه توګه خبرداری ورکړی چې له هلمند سيند څخه د ايران د حقابې د نه تأمينېدو په تړاو به طالبان ځواب وايي، البته که ثابته شي چې په رښتيا هم د حقابې د ورکړې مخنيوی کوي.