اطلاعات روز: د خوست ولایت اوسېدونکي له طالبانو غوښتنه کوي، چې له شپږم ټولګي پورته د نجونو ښوونځیو ته اجازه ورکړي.
د دغه ولایت د اوسېدونکو په خبره چې کال پوره کیږي، خو لاهم ښوونځیو ته د نجونو د ورتګ اجازه نه ده ورکړل شوې او له زده کړو محرومه دي.
دوی زیاتوي، چې د ښوونځیو نه خلاصون په اړه نورې بهانې ولس ته د منلو وړ نه دي او دا د نوي تعلیمي قشر له راتلونکي سره لویه جفا یادوي.
د مرکز یو تن قومي مشر نظیر لکڼوال اطلاعات روز ته وویل، چې په تېر کې یې هم نجونې ښوونځیو ته په حجاب کې تګ کاوه او اوس هم که اجازه ورکړل شي، نو هماغه ډول به خپلو زده کړو ته دوام ورکړي.
هغه وايي: «زمونږ په ټولنه کې خو پخوا هم دغه حجاب کې زمونږ ښځینه زده کوونکې زده کړو ته ورتلې او که ښوونځي خلاص هم شي، نو په همدغه حجاب کې به ورځي، نو هیله مو دا ده، چې د دې لپاره نورې بهانې و نه لټول شي او له ځنډ پرته ورته اجازه ورکړل شي، چې ځنډیلي درسونه یې شروع او له خپل حق څخه برخمنې شي.»
د نور الله په نوم د تڼیو ولسوالۍ یو تن اوسېدونکي بیا د ښوونځیو تړل له راتلونکي نسل سره د حکومت لویه جفا وبلله او وېې ویل، چې څه موده وړاندې د ښځینه ډاکټرانو د کموالي له امله د زلزلې ډیری ښځینه ټپیانو په روغتون کې ساه ورکړه.
نوموړي وویل: «ماته چې له ګاونډي ښخینه ډاکټره د درملنې لپاره راځي او د زلزلې ټپیان مې پټۍ کوي، خو که دا ما خپل ښځینه ډاکټرانې درلودلی نو ولې به هغوی ته مجبور شوی وای او بل که دلته ښځینه ډاکټرانې موجودې وای نو خلک نه مجبوره کېدل چې پاکستان ته ناروغ یوسي، خو بیاهم زما له هغه چا دا غوښتنه ده، چې د نجونو د ښوونځیو خنډ دي، هغوی دې نور د ولس په ارادو لوبې نه کوي او ژر تر ژره دې ښوونځي پرانیزي.»
په دغه ولایت کې د نجونو د یوه ښوونځي ښوونکې مدینه چې ځان یې په مستعار نوم معرفي کاوه اطلاعات روز ته وویل، چې له تېر یوه کال راهیسې د دوی د ښوونځي له شپږم ټولکي پورته نجونې له زده کړو بې برخې شوې او نه شي کولی چې پاتې درسونو ته دوام ورکړي.
د نوموړې په خبره چې تر اوسه د خوست ولایت پوهنې ریاست مسوولینو هم ورته کوم ډاډ نه دی ورکړی چې یاد ښوونځي به کله پیل او په کومو شرایطو به نجونو ته د زده کړو اجازه ورکړي.
هغې وویل: «مونږ ته د درسونو لپاره اوس مهال یوازې تر شپږم ټولګي پورې ښځینه زده کوونکې راځي او ورته زده کړې ورکوو، خو د اووم او ان تر دولسم ټولګي پورې به لاهم د ښوونځیو پیل ته شېبې شماري، کله چې د پوهنې ریاست مسوولین راځي نو هغوی هم تر اوسه کومه هیله مندي نه ده ښودلې، چې دغه ښوونځي به کله پرانیستل شي، خو وايي د وزارت امر ته په تمه یو.»
اوس مهال په خوست کې تر سل زرو ډېرې ښځینه زده کوونکې په ښوونځيو کې شاملې شوي، خو د دې نیمايي یې له زده کړو بې برخې شوې او د طالبانو هغه امر ته په تمه دي، چې بیا به ښوونځي پیل او دوی به پاتې زده کړو ته دوام ورکړي.
څه موده وړاندې د طالبانو د عامې روغتیا سرپرست وزیر ویلي و، چې د نجونو د ښوونځیو د تړل کېدو لامل اقتصادي ستونزې بلل کیږي او زیاته کړې یې وه، چې د دغو ستونزو په حل به یاد ښوونځي بیرته پرانیستل شي.