اطلاعات روز: د امريکا او مرکزي اسيا د هيوادونو استازو يو څه وخت وړاندي په قزاقستان کې د يوې اعلاميې له لارې ټينګار کړی چې د افغانستان د سياسي راتلونکې په تړاو د خبرو يو پراخ بهير اړين دی او همدا راز يې د حاکميتي بنسټونو پر جوړولو تأکيد کړی دی.
دا اعلاميه چې پرون (جمعه، ۲۰ د زمري) د (C5+1) تر غونډې وروسته خپره شوه، پکې راغلي دي چې د امريکا او مرکزي اسيا د هيوادونو ځانګړو استازو د افغانستان د وضعيت او پر سيمې يې د اغېزو په تړاو خبرې کړې دي.
دوی د يوه پراخ، يو موټي، خپلواک، باثباته او بشري حقونو په ځانګړې توګه د ښځو او نجونو حقونو ته د درناوي کوونکي افغانستان ملاتړ کړی دی.
د امريکا او مرکزي اسيا د پنځو هيوادونو استازو ويلي دي چې باثباته او سولييز افغانستان يوازي هغه وخت جوړېدلای شي چې د ښځو او نجونو، قومي او مذهبي لږکيو په شمول ټول افغانان پکې په بشپړه توګه مساوي او معنادار ګډون ولري.
دوی د افغانستان د سياسي راتلونکې په اړه د خبرو-اترو د يوه پراخ بهير پر اړتيا او همدا راز د مسوولو واکمنو بنسټونو پر را منځ ته کېدو ټينګار کړی دی.
د امريکا او د مرکزي اسيا هيوادونو په خپله اعلاميه کې ټينګار کړی دی چې د افغانستان له قلمرو څخه بايد تروريزم او افراطيت د پناهځای، مالي تأمين او له همدې ځايه د خپرېدو استفاده ونه کړي او بايد مخنیوی يې وشي.
همدا راز دوی زياته کړې ده چې په افغانستان کې انساني او اقتصادي شرايطو ته رسيدګي د نړيوالې ټولنې قوي او همغږي غبرګون ته اړتيا لري.
دې هيوادونو په افغانستان کې د تارياکو د کښت د پام وړ کمېدو هرکلی کړی دی، خو د صادراتو د دوام او په افغانستان کې د مصنوعي نشيي توکو د توليد په اړه يې اندېښنه ښوولې ده.
دوی په افغانستان کې د ملګرو ملتونو د سياسي حضور د دوام او پلانونو ملاتړ کړی دی چې غواړي اغېزناکه، مسووله او ټولشموله حکومتولي ترويج او د معنادارو سولييزو بهيرونو ملاتړ وکړي.
