اطلاعات روز: د ايران ځانګړي استازي او په کابل کې د ايران د سفارت سرپرست حسن کاظمي قمي ويلي، چې ايراني کارپوهانو په لومړي ځل د ارزګان ولايت په دهراود ولسوالۍ کې د اوبو د کچې ارزونې له دستګاه څخه ليدنه کړې ده.
ښاغلي قمي تېره شپه (شنبه، ۲۱ د زمري) له «آخرين خبر» نومې ايراني رسنۍ سره په مرکه کې ويلي، چې اوس مهال ايراني کارپوهان په کابل کې دي.
ده زياته کړې، چې «ليدنه شوې ده او بايد راشي راپور ورکړي. ان شاء الله چې راپور ورکړي، بيا به وګورو چې زموږ د متخصصينو برداشت څه دی؟»
د اوبو د کچې د ارزونې دا دستګاه په هلمند کې تر کجکي بند وړاندې، د ارزګان ولايت په دهراوود ولسوالۍ کې ده او د هلمند سيند ته د اوبو د تګ کچه معلوموي.
په دې دستګاه کې د اوبو د کچې د محاسبه کېدو له مخې معلومېږي چې سږ کال اوبه ډېرې او که کمې دي.
د ۱۳۵۱ لمريز کال له تړون سره سم، په يوه نورمال اوبيز کال کې له هلمند سيند څخه د ايران حقابه ۸۲۰ ميليون متر مکعبه اوبه دي. که چيرته په نورو کلونو کې د هلمند په سيند کې اوبه کمې وي، بيا دا کچه هم کمېږي.
له هلمند سيند څخه د ايران حقابه سږکال د طالبانو او ايران تر منځ په لانجمنه مسئله بدله شوې ده.
د ايران ولسمشر ابراهيم رييسي د دې هيواد د حقابې د تأمينېدو په تړاو طالبانو ته ګواښ کړی و.
خو طالبانو د ايراني چارواکو څرګندونو ته په ځواب کې ويلي، چې د وچکالۍ له امله د هلمند په سيند کې کافي اوبه نشته چې ايران ته ورسېږي.
ايران د دې ادعا د رښتيا معلومولو په موخه غوښتنه وکړه چې کارپوهان یې باید د کجکي بند وګوري.
د طالبانو وياند ذبيح الله مجاهد بي بي سي ته ويلي و، چې دا ډله ايراني پلاوي ته د کجکي بند د کتنې اجازه نه ورکوي او داسې څه د ۱۳۵۱ کال په تړون کې نشته.
خو سږ کال د غبرګولي د مياشتې پر ۲۷مه حسن کاظمي قمي د ايراني رسنۍ په يوې ټلويزیوني خپرونې «صف اول» کې ويلي و، چې طالبانو موافقه کړې چې د ايران تخنيکي پلاوی د کجکي بند وګوري.
طالبانو تر اوسه په دهراوود کې د اوبو د کچې ارزونې له دستګاه څخه د ايراني پلاوي د کتنې په اړه څه نه دي ويلي.
