اطلاعات روز: د طالبانو د کانونو او پټروليم وزارت د هيواد د اوو کانونو د استخراج تړونونه له کورنیو او بهرنيو شرکتونو سره لاسليک کړل.
د دې تړونونو د لاسليکولو مراسم نن (پنجشنبه، ۹ د وږي) د طالبانو د رییس الوزار د اقتصادي مرستيال عبدالغني برادر په ګډون جوړ شوي و.
د ښاغلي برادر دفتر د دې مراسمو د يوه راپور په خپرولو سره ويلي ،چې د دې تړونونو ټول ارزښت شپږ ميليارد او ۵۵۷ ميليونه ډالرو ته رسېږي.
د طالبانو د اقتصادي مرستيالۍ د دفتر له راپور سره سم، په دې تړونونو کې د هرات ولايت د غوريان ولسوالۍ د چهار بلاک اوسپنيز معدن تړون هم شامل دی چې له بېلابېلو داخلي او بهرنيو شرکتونو سره لاسليک شوی دی.
د دې ادارې په راپور کې راغلي، چې د دې کان د اول بلاک تړون «وطن درخشان» شرکت ته ورکړل شوی چې د ايران «آذران» صنعتي شرکت يې شريک دی. همدا راز د دې کان د دويم بلاک تړون «د منځني ختيځ ساحلي» شرکت ته ورکړل شوی چې په افغانستان کې يې «دره نور» او له ترکيې څخه يې «اپيکول» شرکت شريکان دي.
د دې راپور له مخې، د هرات د غوريان د اوسپينې کان د درېيم بلاک تړون «شمش» ملي شرکت ته ورکړل شوی چې له برېتانيا څخه «جي بي ايم» او «اي دي ريسورسيس» (AD Resources) يې شريکان دي او د همدې کان د څلورم بلاک تړون «باختر فولاد» شرکت ته ورکړل شوی چې له ايران څخه «سپاهان» او «پارسيان» شرکتونه يې شريکان دي.
همدا راز د طالبانو د اقتصادي مرستيالۍ د دفتر په راپور کې راغلي، چې د غور ولايت د تولک ولسوالۍ د سربو کان د يوه بلاک تړون «افغان انويسټ» شرکت ته ورکړل شوی، د تخار ولايت د چاهآب ولسوالۍ د «طلای سمتی» کان تړون «افغان-چاينا» شرکت ته چې «زورور افغانستان» شرکت يې شريکان دي ورکړل شوی او د لوګر ولايت د مس عينک د دويم کان تړون خصوصي شرکت «توريا» ته ورکړل شوی دی.
د طالبانو اقتصادي مرستيالۍ دفتر ويلي، چې په دې کانو کې د کېدونکې پايلې په وسيله به زرګونو کسانو ته کار پيدا کېږي او د هيواد اقتصادي وضعيت به ورسره ښه شي.
طالبانو د تېرکال په مرغومي مياشت کې د «آمو سیند» د نفتي حوزې د کانونو د استخراج تړون له يوه چينايي شرکت «په سين کيانګ کې د مرکزي اسيا د نفتو او ګاز شرکت» (CPEIC) سره لاسليک کړی و.
طالبانو پر افغانستان تر بیا واکمنېدو وروسته، د هيواد د کانونو استخراج ته په پراخه کچه پام اړولی او په دې لړ کې يې لوی تړونونه لاسليک کړي دي.
د طالبانو له لوري د هيواد د کانونو د استخراج د تړونونو پر لاسليکولو نيوکې هم شوې دي. د هيواد يو شمېر سياسي څېرې وايي، چې دې ډلې د هيواد کانونه «ليلام» ته وړاندې کړي دي.
