اطلاعات روز: «د افغانستان ژغورنې ملي مقاومت شورا» د احمدشاه مسعود د وژل کېدو د دوه ويشتمې کليزې په تړاو په یوې خپرې کړې اعلاميه کې له نړيوالې ټولنې غوښتي چې د افغانانو د برخليک په اړه دې بې تفاوته نه پاتې کېږي.
دا علاميه چې نن (شنبه، ۱۸ د وږي) خپره شوې، پکې راغلي چې د احمدشاه مسعود تر وژل کېدو دوه ويشت کاله وروسته افغانستان «د ژوند په ټولو برخو کې شاته تللی او له يوې تياره او خونړۍ غميزې سره مخ دی».
«د افغانستان ژغورنې ملي مقاومت شورا» نړيوالې ټولنې ته په خطاب کې ويلي، چې «د څلوېښت ميليونه انسانانو برخليک هغې ډلې ته مه ور پرېږدئ چې پر هيڅ ډول انساني بديهياتو او حقوقي او اخلاقي نورمونو باور نه لري».
دې شورا ويلي، چې پر افغانستان د طالبانو د «غير مشروع او ظالمانه واک دوام له زيات تاوتريخوالي، سخت فقر او بېکارۍ، د ظلم او جنايت له تداوم او سيمې او نړۍ ته د تروريستي ګواښونو له پراختيا پرته بله پايله نه لري».
د دې شورا په اعلاميه کې له ټولو ګوندونو او سياسي جريانونو، مدني فعالانو، ښځو او ځوانانو غوښتل شوي چې «د هيواد د ازادۍ لپاره خپل صفونه يو کړي».
دې شورا ويلي: «د هيواد ازادي او پر هيواد د تحميل شوې غاصبې سلطې د ختمولو لپاره مقاومت بايد زموږ ټولو يوازينی لومړيتوب وي».
«د افغانستان ژغورنې ملي مقاومت شورا» په خپله اعلاميه کې احمدشاه مسعود «مومن مجاهد او سرښندونکی» ياد کړی او ويلي يې دي چې نوموړی «له القاعدې او طالبانو سره د سيمې او نړۍ د استخباراتي سازمانونو د ګډې توطيې په پايله کې» ووژل شو.
احمدشاه مسعود د پخواني شوروي د لښکرو او طالبانو پر خلاف د مقاومت يو مهم قومندان و چې د ۱۳۸۰ لمريز کال د وږي د مياشتې پر ۱۸مه نېټه د تخار ولايت خواجه بهاء الدين ولسوالۍ کې د القاعدې د دوو غړو په ځانمرګي بريد کې ووژل شو. دې کسانو خپل ځانونه د خبريالانو په نوم ور پېژندلي وو.
د افغانستان پخواني دولت نوموړي ته د «ملي اتل» لقب ورکړی و او د ده د وژل کېدو کليزه يې عمومي رخصتي اعلان کړې وه.
طالبانو پر افغانستان تر بيا واکمنېدو وروسته د احمدشاه مسعود د وژل کېدو د ورځې رخصتي د هيواد له رسمي کليزې حذف کړې ده.
