اطلاعات روز: ننګرهار او کونړ کې روغتیایي چارواکي وایي، چې د دې ولایتونو په مرکز او ولسوالیو کې د پولیو یا ګوزڼ ضد واکسین اووه ورځنی کمپاین پېل شوی دی.
په ننګرهار ولایت کې د طالبانو د عامې روغتیا رییس مولوي شریف الله امین وایي، چې دا کمپاین نن (شنبه، ۴ د لیندۍ) پېل او اووه ورځې به دوام وکړي.
د نوموړي د معلوماتو له مخې د دغه کمپاین پرمهال به د ننګرهار په ۲۲ ولسوالیو کې له ۱۴ سوه زره ډیر د لسو کالو کم عمره ماشومان واکسین شي.
هغه ګوزڼ یوه نا علاجه او خطرناکه ناروغي وبلله او له خلکو یې وغوښتل، چې د واکسین له ټیمونو سره دې همکاري وکړي او خپل ماشومان دي واکسین کړي.
دغه راز باختر اژانس چې د طالبانو تر مدیریت لاندې فعالیت کوي راپور ورکوي چې کونړ ولایت کې هم د ګوزڼ اووه ورځنی کمپاین پېل شوی دی.
راپور کې راغلي چې دغلته به د ۸۵۰ ټیمونو له لوري ۴۰۰ زره تر لس کلونو کم عمره ماشومان د اووه ورځو په موده کې واکسین شي.
په ورته مهال د ننګرهار عامې روغتیا ریاست د کتلوي معافیت مسوول ډاکټر حکم خان ګلابزوی وايي، د پولیو واکسینو د کمپاین په دې اوه ورځينۍ دوره کې به د ختیځ زون په کچه له دوه نيم مليونه ډیر د لسو کالو کم عمره ماشومان واکسین شي.
بلخوا دیني عالمان وايي، په شرعي لحاظ د واکسین په تطبیق کې هيڅ ډول ممانعت نشته او په وینا یې ټول دیني عالمان د واکسین له کمپاین سره همکار دي.
ننګرهار کې داسې مهال د پولیو یا ګوزڼ ضد واکسین کمپاین پېلیږي، چې د دې ولایت په شپږو ولسوالیو کې د پولیو د شپږو مثبتو پيښو د ثبت کیدو خبر ورکړل شوی.
روغتیایې چارواکي یې لامل له پاکستانه د افغانانو راستنیدل او په ځینو سیمو کې د کورنیو لخوا له واکسین کولو د خپلو ماشومانو ګوښه ساتل یادوي.
