اطلاعات روز: د ملګرو ملتونو د ماشومانو وجهي صندوق (يونيسيف) له پاکستانه په زور د را ایستل شویو افغان کډوالو ماشومانو لپاره د ننګرهار په تورخم کې خوندي ځایونه جوړ کړي دي.
ننګرهار کې د طالبانو د رسنیو له دفتره نن (یکشنبه، ۱۲ د ليندۍ) په خپره شوې خبرپاڼه کې ويل شوي چې د يونيسيف له لوري ماشومانو ته دا جوړ شوي خوندي ځايونه به ۲۴ ساعته پرانيستي وي او له پاکستانه د ایستل شویو ماشومانو لپاره به رواني-ټولنیز ملاتړ او تفریحي فعالیتونه وړاندې کوي، تر څو له خپلو کورنیو سره یوځای شي.
د ننګرهار د رسنيو دفتر له لوري په خپره شوې اعلاميه کې د ماشومانو لپاره د جوړو شويو خوندي ځايونو د شمېر په اړه څه نه دې ويل شوي.
د معلوماتو له مخې، د داسې بې کوره شويو راشړل شويو ماشومانو شمېر لسګونو ته رسیږي چې عمرونه یې د اتو او ديارلسو کلونو تر منځ دي.
تورخم کې د افغان کډوالو ماشومانو لپاره دا خوندي ځایونه داسې مهال کې جوړیږي چې د نومبر په لومړۍ نېټه پاکستان د بې اسنادو افغان کډوالو د ایستلو لړۍ پیل کړې، په دې ډله کې یو شمېر هغه افغان ماشومان هم شامل دي چې له خپلو کورنیو جلا او له سرپرست پرته افغانستان ته شړل شوي دي.
