اطلاعات روز: ننګرهار کې طالب چارواکي وایي، د تورخم دروازه نن یو ځل بیا د پاکستان له لوري د باروړنکو موټرو پرمخ تړل شوې ده.
د تورخم لپاره د طالبانو کمیسار مولوي عصمت الله یعقوب وایي، د تورخم دروازه نن (چهارشنبه، ۱۵ د لیندۍ) سهار پاکستاني لوري د ترانزیټ پرمخ داسې مهال تړلې، چې تېره شپه ناوخته پاکستاني پولیسو غوښتل تورخم دروازې ته څېرمه د افغانستان لوري شل متره مخکې د لوحې په بهانه یوه بله دروازه جوړه کړي، چې د دوی د مخنیوي په غبرګون کې پاکستان لوري د تورخم دروازه د باروړنکو موټرو پر مخ وتړله.
هغه زیاتوي دوی هم د پاکستان د یادې پریکړې پر وړاندې ورته اقدام کړی او هغه پاکستاني موټر چلوونکو ته یې اجازه نه ده ورکړې، چې سوداګریز توکي په کې بار دي.
پاکستان د تیرې عقرب میاشتې په ٣٠مه هم ورته اقدام کړی و او یاده لاره یې د نهه ساعتونو لپاره د سوداګریزو موټرو پرمخ په دې بهانه تړلې وه چې له موټر چلوونکو یې د پاسپورټ او ویزو غوښته کوله.
پاکستاني لوري د بار وړونکو موټرو چلوونکو ته شرط ايښی و، چې نوامبر میاشتې له ٢١مې نېټې وروسته له ويزې پرته پر تورخم دروازه تګ راتګ نهشي کولای.
ځينې موټرچلوونکي هم د پاکستان ياده پرېکړه منصفانه نه بولي او وايي، موټرچلوونکو ته به د ويزو اخيستل ستونزمن شي او دواړه غاړو ته به سوداګريز مالونه لېږد رالېږد هم ټکنی شي.
دوی د طالبانو او پاکستان له حکومتونو غواړي چې موټر چلوونکو ته دې په پخواني سيستم د تګ راتګ اجازه ورکړي او د سیاسي مسایلو پرسر دې سوداګرۍ ته زیان نه رسوي.
پاکستان په دې وروستیو کې دغه هیواد ته د تورخم له لارې د تلوونکو ناروغانو د ورتګ بهیر هم تر نامعلومې نېټې ځنډولی دی.
