اطلاعات روز: د طالبانو د لومړي وزير اداري مرستيال عبدالسلام حنفي وايي، چې ګاونډيو هيوادونو ۸۰۰ زره کډوال را شړلي دي.
نوموړي تېره ورځ (چهارشنبه، ۶ د مرغومي) په کابل کې د يوې غونډې پر مهال د دې شميرو په اعلانولو سره وويل، چې طالبان توانېدلي د کډوالو اخراج مديريت او هغوی ته امکانات برابر کړي.
په دې غونډه کې د طالبانو د رییس الوزرا سياسي مرستيال مولوي عبدالکبير د نړۍ له هيوادونو غوښتي چې په دې سختو شرايطو کې دې کډوال ستنولو ته نه اړ باسي او هغوی ته دې د داوطلبانه ستنېدو اجازه ورکړي.
پاکستان د اکټوبر په مياشت کې د ۱.۷ ميليونه افغان وګړو په ګډون «غير قانوني» کډوالو ته وروستۍ نېټه وټاکله چې بايد دا هيواد پرېږدي، که نه وبه شړل شي.
تر دې نيټې وروسته يوازې له پاکستان څخه شاوخوا نيم ميليون افغانان خپل هيواد ته راستانه شوي دي.
ورته مهال له ايران څخه هم د کډوالو شړل او ستنېدل دوام لري.
په هيواد کې د طالبانو تر واکمنېدو وروسته ځينې کسان کډوالۍ ته اړ شوي دي.
پاکستان وايي، چې «غير قانوني» کډوال د خپل امنيت له کبله باسي او په ايران کې هم د طالبانو تر واکمنېدو وروسته د کډوالو د شمېر د زياتېدو له کبله دا خلک له ځورونې سره مخ دي.
