اطلاعات روز: ننګرهار کې ځایي سرچینې خبر ورکوي، چې د دې ولایت په هسکې مېنې ولسوالۍ کې د طالبانو په ډزو یو ملکي کس وژل شوی دی.
یوې امنیتي سرچینې د نوم نه خپرولو په شرط نن (سې شنبه، ۱۹ د مرغومي) وویل، چې تیره شپه شاوخوا ۳:۰۰ بجې د هسکې مېنې ولسوالۍ اړوند «چنګي قریې» په غریزه سیمه کې د طالبانو سرحدي سرتیرو پر عامو خلکو ډزې کړي، چې پر مهال یې د حبیب الله په نامه د یادې ولسوالۍ یو اوسیدونکی وژل شوی دی.
سرچینه زیاتوي، یاد کس له خپلو نورو کلیوالو سره غره ته د لرګیو راوړلو په موخه روان و، چې د طالبانو لخوا پرې ډزې شوي او وژل شوی دی.
بلخوا د هسکې مېنې ولسوالۍ طالب چارواکو هم یاده پېښه تایید کړې او په تړاو یې د دوو طالب سرتیرو د نیول کیدو خبر ورکړی دی.
له دې وړاندې هم د طالب سرتیرو په هوایي او ختایي ډزو کې د هیواد په بیلابیلو سیمو کې یو شمیر ملکي وګړو ته مرګ ژوبله اوښتې وه، چې د عامو وګړو توند غبرګونونه یې راپارولي وو.