اطلاعات روز: په افغانستان کې د ملګرو ملتونو د مرستندویه پلاوي د معاونت دفتر (يوناما) «د ماين د خطرونو په اړه د پوهاوي او د ماين پاکۍ په چارو کې د همکارۍ د نړيوالې ورځې» په مناسبت ويلي، چې ناچاوده توکي او ماينونه لاهم په ټول افغانستان کې پاشلي دي او د دې هيواد د وګړو په ځانګړې توګه د ماشومانو ژوند ګواښي.
يوناما نن (پنجشنبه، ۱۶ د وري) پر فېسبوک په خپله پاڼه د يوې ويډيو په خپرولو سره ويلي، چې د څو لسيزو د جګړې له کبله نږدې ۴۵ زره افغان وګړي د ماينونو له کبله وژل شوي او يا ژوبل شوي دي.
د يوناما له لوري د وړاندې شويو معلوماتو له مخې د ملګرو ملتونو د ماين پاکۍ دفتر په افغانستان کې تر درو کيلومټرو زياته ځمکه له ماينونو پاکه کړې ده.
يوناما زياته کړې: «خو مهمات او ناچاوده ماينونه لاهم په ټول افغانستان کې پاشلي دي او ټولنې په ځانګړې توګه ماشومان ګواښي؛ په داسې حال کې چې هغوی د خپل ژوند رغولو په هڅه کې دي.»
په افغانستان کې د ملګرو ملتونو د مرستندوی پلاوي د معاونت دفتر د ماين او له جګړې د پاتې ناچاوده توکو د خطرونو په تړاو د پوهاوي زياتېدو او په دې هيواد کې د ماين پاکۍ د کار د ملاتړ لپاره د اتحاد غوښتنه کړې.
د ملګرو ملتونو عمومي منشي انټونيو ګوتريش هم پر ايکس په خپله پاڼه په يوه پيغام کې ليکلي: «ځمکني ماينونه، چاودېدونکي توکي او د جګړې پاتې شوني هغه ميليونونه وګړي مستقيما ګواښي چې په وسله والو نښتو کې بند پاتې شوي، له افغانستانه واخله تر سوډان، اوکراين او غزې پورې.»
د ملګرو ملتونو عمومي منشي ويلي: «راځئ د هر هيواد او هرې ټولنې په ګډون نړۍ د دې وسلو له شره په يوه ځل او د تل لپاره خلاصه کړو.»
افغانستان د څو لسيزو جګړې له کبله په ماینونو او چاودېدونکو توکو يو تر ټولو ککړ هيواد ګڼل کېږي.
د دې ماينونو او چاودېدونکو توکو چاودنې وخت ناوخته د هيوادوالو په ځانګړې توګه د ماشومانو ژوند اخلي.
په تازه پېښه کې د وروستيو ورځو پر مهال په هرات او غزني کې ماينونو ۱۱ تنه ماشومان وژلي دي.
