اطلاعات روز: د طالبانو د کډوالو او بیرته راستنېدونکو چارو وزارت وايي، چې له ايران او پاکستان څخه درې زره او ۷۷ تنه کډوال په خپله خوښه او جبري توګه افغانستان ته راستانه شوي دي.
د دې وزارت له اعلاميې سره سم، پرون (دوشنبه، ۱۴ د غبرګولي) دوه زره او ۴۷۷ کډوال په جبري او داوطلبانه توګه د اسلام کلا بندر له لارې له ایران څخه افغانستان ته راستانه شوي دي.
د طالبانو د کډوالو او بیرته راستنېدونکو چارو وزارت ويلي، چې په دې کسانو کې ۴۴۹ کسان د اړمنو په توګه پېژندل شوي او د کډوالۍ د نړیوال سازمان له لوري ورسره د خوراکي او غير خوراکي توکو مرسته شوې.
دې وزارت زياته کړې، چې په دې کسانو کې ۲۷ ماشومان هم وو چې د «جنګ ماشومانو» موسېسې ته ور پېژندل شوي دي.
د طالبانو د کډوالو وزارت په يوه بېله اعلاميه کې ويلي، چې پرون هم ۵۹۹ کډوال په جبري توګه له پاکستانه افغانستان ته راشړل شوي دي.
د دې وزارت د اعلاميې له مخې، په دې کسانو کې ۳۷۹ تنه د تورخم او ۲۲۰ نور د سپین بولدک له لارې افغانستان ته راغلي دي.
دا کسان هم د کډوالۍ نړیوال سازمان، د کډوالو په چارو کې د ملګرو ملتونو عالي کميشنرۍ او د خوړو نړیوال پروګرام ته د مرستې ترلاسه کولو لپاره معرفي شوي دي.
په دې وروستيو ورځو کې له ایران او پاکستان څخه د افغان کډوالو شړنه او ستنېدنه زياته شوې ده.
د طالبانو د کډوالو او راستنېدونکو وزارت له شمېرو سره سم، هره ورځ په زرګونو تنه له دې دوو هيوادونو په خپله خوښه او جبري توګه افغانستان ته راستنېږي.
