اطلاعات روز: چين او پاکستان په يوه ګډه اعلاميه کې د «پراخ سياسي جوړښت» رامنځته کولو او د متعادلو سياستونو پلي کولو ته د طالبانو د هڅولو لپاره د همغږو نړيوالو هڅو غوښتنه کړې.
دا اعلاميه تېره ورځ (شنبه، ۱۹ د غبرګولي) په بيجينګ کې د پاکستان د لومړي وزير شهباز شريف او د چين د ولسمشر شي جين پينګ تر ليدنې وروسته خپره شوې ده.
دوی همدا راز له طالبانو د «ښه ګاونډيتوب» د سياست د تعقيبولو او له تروريزم سره د دې ډلې د پرېکنده مبارزې غوښتنه کړې.
دې دوو هيوادو ټينګار کړی چې طالبان بايد اجازه ورنه کړي چې د افغانستان خاوره د ترهګریزو موخو لپاره وکارېږي.
د دې هيوادو رهبرانو هوکړه کړې چې د افغانستان د مسلې په تړاو اړيکې او همغږي پياوړې کړي او د افغانستان د پايدار پرمختګ او په نړيواله ټولنه کې د ادغام لپاره رغنده رول ولوبوي.
د پاکستان لومړی وزير شهباز شريف د تېرې اونۍ سېشنبې په ورځ په څلور ورځني سفر چين ته ولاړ او د افغانستان د وضعيت په شمول يې د بېلابېلو مسايلو په اړه د دې هيواد له چارواکو سره خبرې وکړې.
دا سفر د پاکستان د خيبرپښتونخوا ايالت په «بيشام» سيمه کې د يوه بريد پر مهال د پنځو چينايي انجينرانو تر وژل کېدو وروسته شوی دی.
پاکستان ادعا کوي چې دا بريد په افغانستان کې د تحريک طالبان پاکستان له لوري طرح شوی و او په افغانستان کې يې له طالبانو غوښتي چې د دې ډلې مشران او پر چينايي وګړو د بريد عاملين ورته وسپاري.
