اطلاعات روز: د ملګرو ملتونو د ماشومانو د ملاتړو صندوق (يونيسف) اجرايوي مديرې کاترين راسل د طالبانو له لوري تر شپږم ټولګي پورته نجونو پر زده کړو د زر ورځني بنديز په تړاو په خپره کړې اعلاميه کې ويلي، چې د ماشومانو په ځانګړې توګه د نجونو حقونه د سياست سره نه شي یوځای کېدلای.
اغلې راسل په دې اعلاميه کې چې نن (پنجشنبه، ۲۴ د غبرګولي) خپره شوې، د نجونو پر زده کړو زر ورځنی بنديز «د عطف يوه غمجنه او انديښمنوونکې نقطه» بللې ده.
دې زياته کړې، دا زر ورځې چې د نجونو لپاره له دریو ميليارده زدکړييزو ساعتونو سره برابرې دي، له لاسه وتلې دي.
د يونيسف اجرايوي مديرې ويلي: «د ۱.۵ ميليون نجونو لپاره دا سيسټماټيک محروميت نه يوازې د هغوی د زده کړو ډاګيز نقض دی، بلکې له کبله يې د هغوی لپاره فرصتونه کمېږي او رواني روغتيا يې خرابوي.»
د يونيسف د اجرايوي مديرې په وينا، د نجونو پر زده کړو د بنديز اغېز په خپله تر هغوی ډېر زيات دی او په افغانستان کې روان بشري کړکېچ تشديدوي او د دې هيواد پر اقتصاد او د پرمختګ پر بهير بدې اغيزې لري.
اغلې راسل زياته کړې، چې زده کړې يوازې نجونو ته فرصتونه نه برابروي، بلکې د کم عمره واده، خوارځواکۍ او نورو ټولو روغتيايي مشکلاتو پر وړاندې د هغوی ساتنه کوي او د سېلاب، وچکالۍ او زلزلې په څېر افتونو پر وړاندې چې اکثريت وخت په افغانستان کې پېښېږي، د دوی ځواکمنتیا زياتوي.
دې ويلي، چې همکاران يې په افغانستان کې د ټولو ماشومانو د ملاتړ لپاره سخت کار کوي او د دې بنسټ له شريکانو سره يو ځای يې د ۲.۷ ميليونه ماشومانو لپاره د ابتدايي زده کړو زمينه برابره کړې ده.
د يونيسف اجرايوي مديرې ويلي، چې دوی همدا راز د ۶۰۰ زره ماشومانو لپاره چې دوه پر درې برخه يې نجونې دي، د ټولنو له لوري رهبري کېدونکي ټولګي جوړ کړي دي.
دې ټينګار کړی، چې دوی د افغانستان د زده کړييزو بنسټونو د خونديتوب لپاره هر هغه کار کوي چې کولای يې شي.
د يونيسف اجرايوي مديرې له طالبانو غوښتي چې سمدستې دې ټولو ماشومانو ته اجازه ورکړي چې زده کړې پېل کړي او له نړيوالې ټولنې يې هم غوښتي چې د نجونو د زده کړو ملاتړ ته دې دوام ورکړي.
اغلې راسل ويلي: «هيڅ هيواد هغه وخت وړاندې نه شي تللای چې نيم نفوس يې شاته پاتې وي.»
طالبانو پر افغانستان تر بيا ځل واکمنېدو وروسته لومړی د نجونو ښوونځي وتړل، خو د دې ډلې د پوهنې وزارت د ۱۴۰۱ لمريز کال د وري د مياشتې پر درېيمه اعلان وکړ چې تر شپږم ټولګي پورته نجونو لپاره ښوونځي تر بلې خبرتيا پورې تړلي دي.
تر دې وروسته طالبانو په پوهنتونو کې هم د نجونو پر زده کړو بنديز ولګاوه او د هغوی پر وړاندې يې د زده کړو خصوصي ښوونيز مرکزونه هم وتړل.
له هغه وخته تر اوسه نړيوالې ټولنې بيا-بيا د نجونو پر زده کړو د لګېدلي بنديز د لېرې کېدو غوښتنه کړې، خو طالبانو لاهم دا بنديز پر خپل ځای ساتلی دی.
