اطلاعات روز: فراه کې د طالبانو سیمه ییز مسوولین خبر ورکوي، چې د دې ولایت په ګلستان او پرچمن ولسوالیو کې یوه نجلۍ څاه کې د لویدو او یو هلک د دیوال د چپه کیدو په پیښو کې مړه شوي دي.
د دې ولایت د ګلستان ولسوالۍ لپاره د طالبانو ولسوال ملا عزیزاحمد سرباز وایي، چې نن (سې شنبه، ۳ د تلې) د دې ولسوالۍ په «تلکمند» کلي کې د فاطمې په نوم یوه دوه کلنه نجلۍ ژورې برمې ته لویدلې او مړه شوې ده.
نوموړی زیاتوي، چې د دوی تخنیکي ټیم تر دوو ساعتونو پرلپسې هڅو وروسته ونه توانیده چې یاده نجلۍ ژوندۍ وژغوري.
ورته مهال د فراه په پرچمن ولسوالۍ کې د طالبانو ولسوال محمد یاسین ابودجانه وایي، چې د دې ولسوالۍ په «حصارک» کلي کې د دېوال د چپه کېدو له امله یو شپږ کلن هلک خپل ژوند له لاسه ورکړی دی.
هغه د دې پیښې په تړاو نور جزیات نه دي ورکړي.
د هیواد په سویل کې د کورنیو د نه پاملرنې له کبله ډیر کله ماشومان په اوبو د لامبو، ژورو څاګانو کې د لویدو او همدارنګ زړو دیوالونو ترڅنګ د لوبو پرمهال ژوند له لاسه ورکوي.
