اطلاعات روز: په افغانستان کې د ملګرو ملتونو د ماشومانو د ملاتړ صندوق (یونیسف) وايي، چې په ۲۰۲۴ کال کې تر ۵۰۰ ډېر ماشومان د جګړې د پاتې ناچاودو توکو د چاودنو له امله مړه یا ټپیان شوي دي.
د یونیسف دفتر نن (یکشنبه، ۱۶ د مرغومي) ایکس کې پر خپله پاڼه لیکلي، چې تېر کال یې شاوخوا درې میلیونه ماشومانو او د هغوی پالوونکو ته د چاودېدونکو توکو د خطرونو په اړه روزنه ورکړې ده.
د سره صلیب نړیوالې کمېټې بیا په خپل تازه راپور کې ویلي، چې په ۲۰۲۴ میلادي کال کې ۴۵۵ کسان د چاودیدونکو توکو د خطرونو سره تړلو پېښو کې وژل یا ټپیان شوي دي.
د دې ادارې په خپور شوي راپور کې ویل شوي چې ۳۵۹ قربانیان ماشومان وو.
د سره صلیب نړیوالې کمېټې زیاته کړې چې په روان کال کې یې په افغانستان کې د چاودیدونکو موادو له خطرونو سره تړلې ۲۳۴ پېښې ثبت کړي دي.
یادې کمېټې ویلي، چې افغانستان لاهم د چاودیدونکو توکو پر وړاندې یو له متضررو هېوادونو څخه دی.
د څو لسیزو جګړو له امله د افغانستان ځمکه په ماینونو او چاودیدونکو موادو ککړه شوې ده.
ملګري ملتونه وایي، چې په افغانستان کې درې میلیونه خلک له جګړې څخه د پاتې ماینونو او چاودیدونکو توکو په یو کیلومترۍ کې ژوند کوي.
سره صلیب ویلي، چې د ۲۰۲۴ کال په اوږدو کې یې د افغانستان له سرې میاشتې ټولنې سره یو ځای د هېواد په کچه تر ۲۴۰ زرو زیاتو خلکو ته د پوهاوي پروګرامونه برابر کړي دي.
