اطلاعات روز: د کډوالۍ نړیوال سازمان وايي چې د ۲۰۲۴ کال د اکتوبر له لومړۍ نیټې بیا د ډسمبر تر ۳۱ پورې له ایران او پاکستان څخه ۹۸۳ زره او ۵۵ تنه افغانستان ته راغلي دي.
دې بنسټ نن (چهارشنبه، ۳ د سلواغې) د یوه نوي راپور په خپرولو سره ویلي چې د افغانستان پر پوله یې تګ-راتګ څارلی او په دې موده کې له افغانستانه ۷۴۰ او ۳۵۶ تنه یادو دوو هیوادونو ته تللي دي.
د کډوالۍ نړیوال سازمان ویلي چې د دې درو میاشتو پر مهال ۶۰۲ زره او ۳۸۴ تنه له ایران او ۳۸۰ زره او ۶۷۱ تنه له پاکستان څخه افغانستان ته راغلي دي.
دې بنسټ زیاته کړې چې په دې موده کې ۳۴۰ زره او ۷۴۱ تنه له افغانستانه ایران ته او ۳۹۹ زره او ۶۱۵ تنه له افغانستانه پاکستان ته تللي دي.
د دې بنسټ له راپور سره سم، ایران او پاکستان ته د افغانستان د وګړو د تګ عمده وامل اقتصادي مسایل، درملنه او د کورنۍ له غړو سره لیدل دي.
د کډوالۍ نړیوال سازمان ویلي چې د ۲۰۲۴ کال له پیله بیا د دې کال تر پایه له ایرانه د افغانستان د وګړو وتل دې هیواد ته د هغوی تر ورتګ په دوامداره توګه زیات و.
یاد بنسټ د دې لامل د دوو میلیون کډوالو د ایستلو په تړاو د ایراني چارواکو پرېکړه او په دې هیواد کې پر کډوالو د فشار زیاتېدل یاد کړي.
د کډوالۍ نړیوال سازمان ویلي چې که څه هم پاکستان هم د ایران په څېر د کډوالو د ایستلو هڅې پیل کړې دي، خو له دې هیواده د وتلو او ورتګ کچې تر یوه حده توازن درلود.
همدا راز دې بنسټ ویلي چې د ۲۰۲۴ کال له پیله او بیا د همدې کال تر پایه له ایران او پاکستان څخه افغانستان ته درې میلیون او ۳۸۶ زره او ۴۶۱ تنه راغلي او دوه میلیون او ۴۶۹ زره او ۲۹۹ تنه له افغانستانه یادو دوو هیوادونو ته تللي دي.
د کډوالۍ نړیوال سازمان د ۲۰۲۴ کال له پیله د افغانستان پر پولو د تګ-راتګ څارنه پیل کړې ده.
دا بنسټ د اسلام کلا، میلک، تورخم، سپین بولدک، ابو نصر فراهي، بارامچې، انګور اډې، غلام خان، نظرپستې او پټان پر لارو د تګ-راتګ د څار پر اساس خپلې شمېرې برابروي.
ایران او پاکستان د ۲۰۲۴ کال پر مهال د افغان کډوالو شړل زیات کړي او په بېلابېلو ښارونو کې کډوال نیسي او شړي یې.
