اطلاعات روز: د ملګرو ملتونو د بشري حقونو شورا اعلان کړی چې د نړۍ د بشري حقونو د وضعیت ارزولو په موخه به د دوی ۵۸مه غونډه راتلونکې دوشنبه (۶ د کب) پیل شي. دا غونډه به د راتلونکي لمریز کال د وري تر ۱۶مې نیټې دوام ولري.
د دې شورا د اعلامیې له مخې، د ملګرو ملتونو د بشري حقونو ځانګړی راپورچي ریچارډ بېنټ به د جمعې په ورځ (د کب ۱۰مه/ د فبرورۍ ۲۸مه) خپل راپور د افغانستان د بشري حقونو د وضعیت په اړه وړاندې کړي.
دا غونډه به د دوشنبې په ورځ د جینوا په وخت سهار ۹:۰۰ بجې د ملګرو ملتونو د سرمنشي انټونیو ګوتریش په وینا سره پیل شي.
د ملګرو ملتونو د بشري حقونو شورا ویلي، چې له هغه وروسته به ولکر ترک، د بشري حقونو عالي کمېشنر، فیلیمون یانګ، د ملګرو ملتونو د عمومي اسمبلې رییس، او اګنازیو کاسیس، د سویس د بهرنیو چارو وزیر په دې غونډه کې وینا وکړي.
دې شورا زیاته کړې چې د دې غونډې په لړ کې به ۳۰ تعاملي خبرې اترې د بشري حقونو له عالي کمېشنر، د هغه له دفتر، د ملګرو ملتونو له کارپوهانو، د ځانګړو کړنلارو له مامورینو، د تحقیقي میکانیزمونو له استازو او د ملګرو ملتونو له ځانګړو استازو سره ترسره شي.
د دې شورا د اعلامیې له مخې، په دې غونډه کې به پنځه پیاوړي شوي ډیالوګونه، یو د لوړې کچې ډیالوګ، او د بشري حقونو په اړه نهه عمومي بحثونه هم شامل وي.
د ملګرو ملتونو د بشري حقونو شورا په خپلو پخوانیو غونډو کې هم په افغانستان کې د بشري حقونو وضعیت ته بیاکتنه کړې وه او پر ښځو او نجونو د طالبانو د محدودیتونو په اړه یې اندیښنه څرګنده کړې وه.
