اطلاعات روز: د طالبانو د حکومت د کډوالو ستونزو ته د رسیدو عالي کمیسیون له ګاونډیو هیوادونو غوښتي چې د افغان کډوالو د سمدستي او جبري ایستلو څخه ډډه وکړي.
دغه کمیسیون پرون (یکشنبه، ۲۶ د کب) د طالبانو د رییس الوزرا د اداري مرستیال عبدالسلام حنفي په مشرۍ غونډه کړې.
د ارګ د خبرپاڼې له مخې په غونډه کې ټینګار شوی، چې د کډوالو ستونزو ته د رسېدو په برخه کې ټولې کمېټې خپل فعالیتونه لا ګړندي کړي، ترڅو خدمات چټک او افغان کډوالو ته په کور دننه اسانتیاوې برابرې شي.
د کډوالو ستونزو ته د رسیدو عالي کمیسیون دغه راز له ګاونډیو هېوادونو غوښتي چې د افغان کډوالو د سمدستي او جبري ایستلو ډډه وکړي او د ګډ میکانیزم له مخې یې هیواد ته انتقال کړي.
دغه کمیسیون د اسلامي همکاریو سازمان، ملګرو ملتونو، اروپايي ټولنې او نورو نړیوالو بنسټونو څخه غوښتي، چې د افغان کډوالو ستونزو ته ځانګړې پاملرنه وکړي، ترڅو د ګاونډيو هيوادونو د چارواکو د بیړنیو او ناعادلانه پرېکړو له امله د افغان کډوالو حقوق «تر پښو لاندې نه شي او له هغوی سره زور زیاتې ونه شي».
د طالبانو یاد کمیسیون ویلي، چې نړيوال بنسټونه بايد له کوربه هیوادونو سره د لېږد په سالمې پروسې کار وکړي او همدارنګه یې له یادو بنسټونو غوښتي چې له افغان کډوالو سره خپلو لازمو همکاريو ته دوام ورکړي.
د افغانستان ګاونډیو هېوادونو، په ځانګړي توګه پاکستان او ایران، د کډوالو ایستل ګړندي کړي دي.
د پاکستان حکومت هغو کډوالو ته چې د افغانستان د تابعیت کارتونه (اې سیسی) لري د مارچ تر ۳۱مې پورې وخت ورکړی چې له دې هیواده ووځي.
پاکستاني چارواکي اټکل کوي چې له ۸۰۰زرو څخه ډیر کډوال د افغانستان د تابعیت کارتونه لري.
دغه راز ایران هم اعلان کړی چې د افغان وګړو د سرشمېرنې فورمو اعتبار به نه غځول کېږي، چې دا د دې ښودنه کوي چې د دې کارت لرونکي به د راتلونکي لمریز کال له پیل څخه د شړلو له خطر سره مخ وي.
