اطلاعات روز: د طالبانو ویاند ذبیح الله مجاهد د پاکستان په بلوچستان ایالت کې د زده کونکو په بس باندې برید غندلی او د پاکستاني چارواکو هغه ادعاوې یې رد کړي چې ګواکې دا برید له افغانستان سره تړاو لري.
مجاهد تېره شپه (چهارشنبه، ۳۱ د غویي) ایکس کې پر خپله پاڼه لیکلي، چې پر ماشومانو او ملکي وګړو برید په هیڅ ډول د توجیه وړ نه دی.
هغه ویلي، چې طالبان د پاکستاني چارواکو هغه ادعاوې په کلکه ردوي چې وايي، دا ډول بریدونه له افغانستان سره تړاو لري.
د طالبانو ویاند زیاته کړې، چې پاکستاني چارواکي باید پرته له کوم دلیل یا توجیه څخه افغانستان د دې پیښو مسوول ونه ګڼي.
مجاهد ادعا کړې، چې طالبان به هیچا ته اجازه ورنکړي چې د افغانستان خاوره د چا پر ضد وکارول شي.
پرون سهار د بلوچستان په خضدار سیمه کې د زده کونکو بس د یوې زورورې چاودنې هدف وګرځیده.
د پاکستاني چارواکو په وینا، په دې برید کې د درې زده کوونکي په ګډون پنځه کسان وژل شوي او لسګونه نور ټپیان دي.
د بلوچستان ایالت اعلی وزیر سرفراز بوګټي د دې برید پړه پر هند اچولې او ویلي یې دي چې بریدګر له هند څخه پیسې اخلي.
هغه دغه راز ویلي، چې د طالبانو تر کنټرول لاندې افغان خاوره په مکرر ډول د پاکستان پر ضد کارول شوې ده.
بوګټي پر طالبانو غږ کړی چې د دوحې په تړون کې خپلې ژمنې پوره کړي او ډاډ ترلاسه کړي چې د افغانستان خاوره د پولې هاخوا ترهګرۍ لپاره ونه کارول شي.
پاکستاني چارواکو په وار وار ادعا کړې چې ترهګرې ډلې په افغانستان کې میشتې دي او له هغه ځایه په پاکستان کې خپل بریدونه تنظیموي.
د ملګرو ملتونو د امنیت شورا د څارنې کمیټې هم په خپلو راپورونو کې په افغانستان کې د تحریک طالبان پاکستان په ګډون د وسله والو ډلو شتون تایید کړی دی.
خو، طالبان تل په افغانستان کې د ترهګرو ډلو شتون ردوي او وايي، چې د افغانستان خاوره د نورو هېوادونو پر ضد نه کارول کېږي.
