د طالبانو د د ټولګټو وزارت د اوسپنې پټلۍ مرستیال محمد اسحاق صاحبزاده د یوه پلاوي په مشرۍ ازبکستان ته سفر کړی او هلته یې د دغه هېواد د اوسپنې پټلۍ ادارې له مشر ظفر نرزلوف سره کتلي دي.
د دې وزارت ویاند محمد اشرف حقشناس نن (چهارشنبه،۳۱ د چنګاښ) په خپره کړې خبرپاڼه کې ازبکستان ته د دغه پلاوي د سفر خبر ورکړی دی.
هغه ویلي، چې له دې ناستې موخه د وسپنې پټلۍ په برخه کې د دواړو هېوادونو ترمنځ د دوه اړخیزو همکاریو پیاوړتیا، د ګډو پروژو تعقیب او د زېربنایي پروژو د پلي کېدو د بهیر چټکتیا وه.
حقشناس زیاته کړې، چې په دې غونډه کې د بېلابېلو موضوعاتو ترڅنګ د «افغان–ټرانس» پروژې د مطالعاتو او د امکانسنجۍ د کار د پیل په اړه هم خبرې شوې دي.
همداراز، افغانستان ته د هرات – مزارشریف د اوسپنې پټلۍ د امکانسنجۍ او سروې د اسنادو سپارل، د تاسیساتو او نورو ګودامونو جوړول، او د حیرتان – مزارشریف د اوسپنې پټلۍ د څلورم بندر په ساحه کې د فرعي پټلیو جوړول هم د بحث له مهمو موضوعاتو څخه وو.
صاحبزاده او نرزلوف د افغانستان او ازبکستان ترمنځ د اوسپنې پټلۍ له لارې د سوداګریزو توکو د لېږد د زیاتوالي پر تخنیکي مسایلو هم خبرې کړې دي.
د افغانستان او ازبکستان ترمنځ د روان میلادي کال په لومړیو شپږو میاشتو کې د اوسپنې پټلۍ له لارې د سوداګرۍ کچه ۳.۵ میلیونه ټنو ته رسېدلې ده.
د مرکزي اسیا هېوادونو د اوسپنې پټلۍ له لارې د افغانستان او پاکستان د خاورې په مسیر د هند سمندر سره د نښلولو پروژه، چې د سیمې له سترو ترانسپورتي پروژو څخه شمېرل کېږي، لا هم د امکانسنجۍ په پړاو کې ده.
